Заранкі (1924)/Песьня маладога аратага

← На прадвесьні

Песьня маладога аратага Верш Аўтар: Янка Журба 1924 год

На полі →

Прапануем да спампаваньня!

ПЕСЬНЯ МАЛАДОГА АРАТАГА.

Золак зьяе. Ціха ў полі.
Ў небе чутны дзіўны хор.
Я з вясёлай песьняй волі
Выяжджаю на прастор.

Раньніх птушак прывітаньне,
Песьні, працу і зямлю
І вясеньняе сьвітаньне —
Як-жа моцна я люблю!

Малады і здольнасьць маю,
Сілы, гарту ў мяне шмат;
Для карысьці свайго краю
Працаваць заўсёды рад.

Я пяшчаныя загоны
Добра, тлуста угнаю;
Ўзыйдуць добрыя тут плёны,
Як старанна абраблю.

Гэй, мой конік, на разлогі!
Варушыся хутка, брат;
Нашы новыя нарогі
Зробяць ў полі добры лад.

На дзярністых на палетках
Новай долі чую дух.
Мне ня грозна праца ўлетку:
Рэжа ёмка скібы плуг.

Я працую бяз прынукі
Ад зары і да зары.
Больш ня будзе ўціску, мукі:
Мы жыцьця гаспадары!..

Золак зьяе. Ціха ў полі.
У небе чутны дзіўны хор.
Я з вясёлай песьняй волі
Выяжджаю на прастор.