«Асвабадзіцелям» і з тога, і з другога боку

«Асвабадзіцелям» і з тога і з другога боку
Верш
Аўтар: Ігнат Дварчанін
1921 год
Крыніца: Часопіс «Наша Думка», № 27, 8 ліпеня 1921 г., б. 3

Спампаваць тэкст у фармаце EPUB Спампаваць тэкст у фармаце RTF Спампаваць тэкст у фармаце PDF Прапануем да спампаваньня!





«Асвабадзіцелям» і з тога і з другога боку



Маўчаць ня трэба, сьвет увесь хай чуе,
Адкрыта, трэба ўсім сказаць,
Сябе хай сэрца моўчкі ня бічуе,
Цішком усіх нам сьлез не паглыкаць…

Пара ўжо! Ірвуцца тыя путы,
Якімі нас хацелі абкруціць! —
Так ведайце-ж, і здрайцы й баламуты.
Што й мы жывём, што хочам жыць.

Чаго прышлі да нас? Чаго вам трэба?
Нас вызваляць? асвабаджаць?
Свабоды вашае ня просім мы ад Неба,
Яе і ворагам ня радзім знаць,

Ня трэба нам яе! Сабе вы занатуйце,
Назад вазьмеце свой вы дар!
І ведайце народу голас, чуйце:
„Я сам сабе і Пан і Гаспадар.


І. Д.