Мой дом (1946)/У летні адпачынак
← На усходзе сонца | Мой дом У летні адпачынак Аўтар: Якуб Колас |
Пажаданні пад новы год → |
У ЛЕТНІ АДПАЧЫНАК
На століку маім ляжаць паперы,
Чарнільніца, як мачыха, стаіць,
А мне так хочацца зірнуць за дзверы,
На двор пайсці ды неба даль праверыць,
Агледзець хмар каралавую ніць.
Люблю я іх, — люблю іх узнікненне
І вольны рух па сонечным шляху,
Іх шпаркі рост, купчастае адзенне.
Люблю глядзець, як неба сутарэнне
Узносіць іх кудлатую страху.
Чарнільніца мая глядзіць з дакорам
І думае, напэўна, — ох, гультай!
А я тады адказваю з пакорай:
Я толькі пакурыць, вярнуся скора —
Хвіліначку, галубка, пачакай!
І я за дзверы шусь! — і я на волі.
Такі табе навокала прастор!
Кучматы лес, утульны луг і поле.
Гляджу, што дзеецца ў блакітным доле,
І бачу — хмара ціснецца на бор.
Іду ў лясок сачыць за хмарай гэтай,
Між сосен двух калышацца гамак.
І чую я — гром глуха грымнуў дзе-та.
Я ў гамаку, — п’ю чары, слодыч лета, —
Чарнільніца-ж мне кажа там — лайдак!
17/IX — 1939 г.