«Беларускай крыніцы»

«Беларускай крыніцы» Аўтар: Алесь Мілюць 1935 Крыніца: Скрыжалі памяці. Кніга другая - с. 318

Прапануем да спампаваньня!

З нагоды 19 года яе выдання

Ты, «Беларуская крыніца»,
Адна з праўдзівейшых газет!
Ад шчырых слоў душы крывіцкай
Прымі пяснярскі мой прывет!

Ты — найстарэйшая газета!
Бо дзевятнаццаты ўжо год
Праз цемру зла да праўды свету
Вядзеш працоўны наш народ.

Ты — светач-зорка новай эры,
Народнай волі зорны шлях...
Ты — сымбаль ходання і веры,
У лепшу будучыню гмах.

Ты, ўсцяж йдучы да светлай мэты,
Смяротным ворагам на страх,
Трымаеш горда перад светам
Наш бел-чырвона-белы сцяг.

Ты — дух народнага імкнення,
Што магутнее з года ў год.
Да волі, шчасця й адраджэння
Заспаны будзіш ты народ.

Дык з гора, з крыўдаў і цярпенняў
Пакутны край наш вызваляй,
Для славы прышлых пакаленняў
Свой Новы год распачынай.
10 студзеня 1935 г.
Скорычы