Барвенак (1924)/Чары каханьня/Зьвіні, зьвіні

Зьвіні, зьвіні
Верш
Аўтар: Алесь Гурло
1924 год

Іншыя публікацыі гэтага твора: Зьвіні, зьвіні…

Прапануем да спампаваньня!

ЗЬВІНІ, ЗЬВІНІ…

Зьвіні, зьвіні, струна надзеі,
Зьвіні, зьвіні, зьвіні, зьвіні!
Гані, гані, віхор, завеі,
Каб засьвяціліся агні!..
Пад цемень ночы
Так сэрца хоча
Пачуць зьвінячую струну;
Глядзяцца вочы
Ў прастор прароча —
Няма спачынку, няма ім сну…
Імкнуцца мары
Ў прастор абшараў,
Ў прастор няведамай красы, —
Падслухаць сэрца,
Удары ў сэрца,
І струн надзеі — галасы…
Зьвіні, зьвіні, струна надзеі,
Звіні, зьвіні, зьвіні, зьвіні!
Гані, гані, віхор, завеі,
Каб засьвяціліся агні!..