Безназоўнае (1925)/Цішку Гартнаму…

← Пазвалі вас…

Цішку Гартнаму… Верш Аўтар: Янка Купала 1925 год

На сьмерць Сьцяпана Булата →

Іншыя публікацыі гэтага твора: Цішку Гартнаму (Купала).

Прапануем да спампаваньня!

ЦІШКУ ГАРТНАМУ

У пятнаццатую гадавіну яго
шчырай пясьнярскай працы на
карысьць Беларускага працоў- 
нага люду.

Многа поля з добрай доляй,
Нешчасьліва і шчасьліва,
Праляцеў ты, мой саколе,
Па-над роднай нашай нівай.

У сьвітаньне, у прадвесьне,
З непамернай гордай сілай
Пела бура табе песьні,
Думкі бурныя будзіла.

І мацнелі твае крыльлі,
І мацнеў дух неўгамонны
А вясёлкі шлях сачылі,
А маланкі слалі ўклоны.

Яснай зоркай з-пад аблокаў
Азіраеш пуцявіну,
Па якой ты ненарокам
Мкнуўся к сонцу бяз упыну.
Нікнуць чары ў пору гэту,
З воч спадае асьляпленьне,
І законы піша сьвету
Людзкай праўды вызваленьне.

Гэй, ляці, саколе, далей
Па-над буйнай Беларусяй!
Ня спыняйся ў векаў далі
І ня гніся, як ня гнуўся.

---