Божа мой! Я чую зноў...

Божа мой! Я чую зноў... Верш Аўтар: Алесь Гарун 1914 Крыніца: https://knihi.com/Ales_Harun/Boza_moj_Ja_cuju_znou_spz.html

Прапануем да спампаваньня!

Божа мой! Я чую зноў —

Як мацнее ў мяне кроў.

А ў грудзях сэрца б’ецца,

Па галоўцы жа вінецца

Думка нова, ды старая,

А вагромна, а святая...

А ўсяму, ўсяму прычына:

Мая родная зямліна —

Ужо варушыцца, ўстае,

Падымаецца, жыве...

Гэта чую я без слоў,

Дык мацнее ў мяне кроў!..