Ветразі (1929)/II/Аб мінулым

Аб мінулым
Верш
Аўтар: Тодар Кляшторны
1929 год

Прапануем да спампаваньня!

Зразумець,
Перажыць,
Успрыняць.

II

АБ МІНУЛЫМ

Напорны час,
Імклівы час…

Гарыць агнём жывое сэрца…
Крывёю купленае раз
За золата не прадаецца.

Успомні, дружа,
Дружа мой

(Сягоньня стоячы ў аддалі),
Якою страшнаю цаной
Мы сьцяг саветаў здабывалі.

Пылалі дні,
Гарэлі дні

Крывава-дымным агняцьветам…
У далях дальнія агні,
І недасягнутая мэта.

А мы ішлі,
А мы ішлі

З нечалавечаю адвагай, —
Ці стаць ахвяраю зямлі,
Ці зьдзейсьніць з гонарам прысягу.

Тут бацька й сын,
Тут бацька й сын

Ахвотна з гонарам адзелі
Тады расійскі карабін,
І ветрам шытыя шынэлі.

А недзе там,
А недзе там

Старыя гнёзды вартавалі:
За грошы куплены салдат, —
Крыжы, вяроўкі і мэдалі.

Расійскі трон,
Салдат, барон,

Да іх, як неякі дадатак:
Францускі штык, ангельскі танк,
Амэрыканскія гарматы.

Напорны час,
Імклівы час,

Гарыць агнём жывое сэрца…
Крывёю купленае раз
За золата не прадаецца.

Варожы плян,
Варожы сьцяг

Навалай грознаю памяты…
Няўдалы шаг, няўдалы шаг,
Нікчэмны танкі і гарматы.

Бо мы далі,
Далі зарок

Не пакідаць чырвонай зброі,
Пакуль ня купім кожны крок
Сваёй бунтарскаю крывёю.

Вось так, таварыш, —
Дружа мой!

Успомні стоячы ў аддалі,
Якою страшнаю цаной
Мы сьцяг саветаў здабывалі.

23-II—28 г.