Вецер, вецер, малады, гарачы
| Вецер, вецер, малады, гарачы Верш Аўтар: Змітрок Бядуля Крыніца: http://biadulia.ru/stories/251.htm |
Прапануем да спампаваньня!
Вецер, вецер, малады, гарачы,
Задзівіся з поўдня на гару! —
Хай твой грэбень галаву маю скудлачыць
На зару!
Мора, мора, казачнае ў ранне,
3 сінім дзівам на пясчыстым дне!
Кінь прасторы бірузовага цвітання
Ў вочы мне!
Горы, горы, з клёкатам арліным,
Хай зазвоніць хвояй ваш адкос!
Падаруйце майму сэрцу гучных гімнаў
Адгалос!
Сонца, сонца, кветка над абшарам
Між вандроўных срэбраных вятроў!
Хай твой пламень светазарны запажарыць
Маю кроў!