Водгульле (1922)/Дзьве дарогі

← На пераломе

Дзьве дарогі Верш Аўтар: Якуб Колас 1922 год

На рэчцы →

Іншыя публікацыі гэтага твора: Дзьве дарогі (Колас).

Прапануем да спампаваньня!

У ДЗЬВЕ ДАРОГІ.

Над балотам, над лясамі
Жураўлі крычаць,
Бы сваімі галасамі
Хочуць вестку даць,

Што цяпло мінецца скора
І заглухне бор,
Ў полі сіняга прастору
Ня угледзіш зор;

Што нагоніць хмар вятруга,
Наплыве туман,
І абніме гора — туга
Поле, лес, курган…

Разам з вамі, вольны вырай,
Палячу і я,
Толькі-ж к сьмерці стане бліжай
Сьцежка там мая.

Ляціцё вы ў край паўднёвы
Зіму пераждаць,
Каб на весну песьняй новай
Родны кут вітаць.

А я еду, госьці лета,
Ў той крывавы вір,
Дзе вар’яцтва ўсяго сьвету
Свой спраўляе пір.

22/VII 1917 г.