Вось мая мэта...
| Вось мая мэта... Верш Аўтар: Міхась Васілёк 1926 Крыніца: Вершы. - 1973. — с. 38 |
Прапануем да спампаваньня!
Не гавары мне, што грудзі збалелыя
Родзяць убогія думкі нясмелыя,--
Не гавары!
Глянь, як іграе вясна пералівамі,
Песню калыша над роднымі нівамі,--
Глянь на зары!
Хочацца выйсці хутчэй на дарогу,
Выйсці са сцягам, пад гімн перамогі
Клікаць яе.
Вось мая мэта, жаданні імклівыя,
Шчырага сэрца пачуцці праўдзівыя --
Думкі мае…
1926