Крест ся Хрістов славою верных именует,
Им ся самым апостол хвалить росказует.
Тым ся знаком Божія церков украшает
И старожитных домов зацность вывышает.
Тым ся лукавых духов гуфы прогоняют
И варварских народов полки побеждают.
Щасливый дом Окгинских, который тот мает
Клейнот с продков поданый, и в ним ся кохает.
Кгды ж то знак набоженства и сталое веры,
Тым ся здавна их здобят сынове и дщеры.
А на том фундаменте вси цноты будуют,
Отчизне милой делным мужством услугуют.
Што звыкло безсмертную славу им еднати,
Которая на свете поты будет трвати,
Поки месяц и звезды свой бег справовати
И ночные темности будут просвещати.