Збор твораў (Бядуля, 1937)/V/Хвалі гралі стаямі

← Сакавік

*** Хвалі гралі стаямі Верш Аўтар: Змітрок Бядуля 1937 год

*** Ноч разліла свой атрамант →

Іншыя публікацыі гэтага твора: Хвалі гралі стаямі…

Прапануем да спампаваньня!

∗∗∗

Хвалі гралі стаямі,
Гнуліся хрыбты.
Пена млела, таяла
Ў мгненні залатым.

Хваля хвалю горбіла,
Звон звінеў шкляны.
Гойдаліся гойдаўкі,
Зыбуны-чаўны.

Хвалі-грайкі бавілі
Мора аксаміт,
Вабай-клікам вабілі,
Клікалі ў блакіт.

Кіўкамі ківаліся
У шызы курадым,
Звонам-зовам звалі ўсіх:
— Гэй, да нас сюды!

Гагры, 22/III 1926 г.