Збор твораў (Колас, 1928—1929)/I/1/I/Песьні вясны

← Асеньні дождж

Песьні вясны Верш Аўтар: Якуб Колас 1928 год

Лес →

Іншыя публікацыі гэтага твора: Песьні вясны.

Прапануем да спампаваньня!

ПЕСЬНІ ВЯСНЫ

Песьні ў полі, шум і гоман.
Ну-ж і выдаўся дзянёк!
Сьнег на дзірах, лёд надломан,
І сьпявае ручаёк:

«Гэй, сябры, гэй, ручаёчкі!
Дружна разам пабягом.
Гайда, гайда ў сьвет, браточкі,
К тым шырокім берагом!

Людзі-волаты! глядзеце,
Колькі гонім мы вады,
Бо яднаньне — сіла ў сьвеце,
Хто-ж дужэй ад грамады?

Мы дарогі ў полі знаем,
Не заблудзіць там вада —
Знаньне — сіла! мы гукаем.
Гэй, за намі, грамада!

Мы імчым, мы гонім воды,
Затапілі мы брады.
Дружнасьць — першы крок свабоды,
Згода — сіла грамады».

1909 г.