Збор твораў (Колас, 1928—1929)/I/1/II/Жыта

← Рольнік

Жыта Верш Аўтар: Якуб Колас 1928 год

Жніво →

Іншыя публікацыі гэтага твора: Жыта (Колас).

Прапануем да спампаваньня!

ЖЫТА

Неспакойна зашумела
Маладое жыта
І штось боязна шапоча
Ды няўцямна-скрыта.

І калосьсе многазначна
Клоніць, гне галовы.
Нібы іх чым устрывожыў
Душны дзень ліпнёвы.

І гамоняць ды гамоняць
З срэбранай саломкай.
І шумяць, шумяць загоны
Сьцішанай гамонкай.

Што варожыш ты нам, жыта,
Гнешся траўкай ніцай?
Ці бяду ты прачуваеш,
Подых навальніцы?

Неба з захаду цямнее,
Крые даль смугою.
Шэпча жыта, нібы стогне
Здушанай тугою.

„Што-то будзе? Што-то будзе?“
Шэпча ў полі жыта.
Цісьне хмара, хмара-цемра,
Гром гудзе сярдзіта.

Ідзі ў чыстае ты поле,
Градавая хмара!
І зьлітуйся над жытамі —
Над сялянскім дарам!

1909 г.