Збор твораў (Колас, 1928—1929)/I/1/III/Вобраз пакуты

← Удовіна хата

Вобраз пакуты Верш Аўтар: Якуб Колас 1928 год

Панас гуляе →

Іншыя публікацыі гэтага твора: Вобраз пакуты.

Прапануем да спампаваньня!

ВОБРАЗ ПАКУТЫ

Па зямлі і ўдзень і ўночы
Ходзіць асьцярожна
Чорным ценем, злою зданьню
Страшны падарожны.

Балахон яго на латах,
Бледны твар аплёван,
Акрываўлена ўсё цела,
Ланцугамі скован.

Ходзіць ён па бедных вёсках,
Па глухіх закутках,
Пакідае за сабою
Гора, сьлёзы, смутак.

І снуецца цень пакуты
І снавацца будзе,
Покі вочы не разьвяжуць,
Не расчыняць людзі.

1908 г.