Збор твораў (Купала, 1925—1932)/I/Жалейка/Люлі, люлі, мужычок!

← А ты, браце, сьпі!

Люлі, люлі, мужычок! Верш Аўтар: Янка Купала 1925 год

Эй, скажы, мужычок!.. →

Іншыя публікацыі гэтага твора: Люлі, люлі, мужычок!

Прапануем да спампаваньня!

ЛЮЛІ, ЛЮЛІ, МУЖЫЧОК!

Шуміць шумненька барок
Песьняй жаласьнянай;
Люлі, люлі, мужычок!
Сьпі — ўставаць зарана!

Яшчэ поўнач пятухі
Першыя ня пелі;
Твае коні-валахі
Сена не паелі.

Шыпяць, сьвішчуць па лугох
Вужы, скарпіякі,
А па стайнях, па хлявох
Лазяць ваўкалакі.^[1]

Ведзьмы, совы, кажаны
Круцяцца, лятаюць,
На сваіх бацькоў сыны
Залом заламляюць.

Зьмей панёс чараўніком
Грошы ад скупога:
Ваўкі выюць пад лясом,
Аж ляціць трывога.

Шуміць шумненька барок
Песьняй жаласьнянай;
Люлі, люлі, мужычок!
Сьпі — ўставаць зарана!

Яшчэ вокал цемната
Над сьветам пануе, —
Яшчэ міласьць, дабрата
Людзей не раўнуе…

---

---

1. „Ваўкалак“ — парасійску, „Оборотень“, паўкраінску „Перевертень“, узяты поэтаю з народных павер‘яў і ўжыты для большай вобразнасьці. Рэд.