Сёньня ў сэрцы звоніць радасьць,
Ў ім палаюць агняцьветы.
Ты мне, любая, ня здрадзіш?
Ты ня здрадзіш, ты ня здрадзіш
Песьні шчырага поэты.
Што было, таго ня будзе:
Сум зьмяніла песьня-радасьць.
І хвалюе мае грудзі,
Мае грудзі, мае грудзі
І прыгожасьць і прынада.
Сон мой збыўся, твой — таксама.
Ўспомні ты наш дзень спатканьня —
Тады жыта каласамі,
Каласамі, каласамі
Нам шаптала прывітаньні.
Тваё сэрца боль адчула,
А маё — адну трывогу:
Ці ты будзеш шчыра-чулай,
Шчыра-чулай, шчыра-чулай,
Каб ступіць на шлях-дарогу,
На якую сталі сёньня?
І прыбоі і адбоі
Сёньня ў сэрцы моцна звоняць,
Моцна звоняць, моцна звоняць
Пра жыцьцё маё з табою.
1926 г.
|