Ліст Стэфана Баторыя (21 студзеня 1584)

Ліст Ліст Аўтар: Стэфан Баторый 21 студзеня 1584

Прапануем да спампаваньня!

Листъ кр. Стефана, писаный въ Кгроднѣ, року 1584, генваря 21 дня.

Стефанъ, Божею мил. кр. Пол., вел. к-з. Лит., Рускій, Прускій, Жомоитскій, Мазовецкій, Иѳлянскій, Седмигродскій и прочая.

«Княземъ, паномъ, воеводомъ, кашталяномъ, маршалкомъ, старостамъ, державцомъ, урядникомъ земскимъ и дворнымъ, всѣмъ вобецъ такъ стану духовного, яко и свѣтского, а меновите войтомъ, бурмистромъ, радцамъ, въ мѣстѣ нашомъ Виленскомъ будучимъ.

«Ижъ есмы календаръ новопоправленый въ панствахъ нашихъ приняти казали, учинилисмы то зъ великихъ а важныхъ причинъ. Въ чомъ не йдетъ намъ о тое, абысмо обходовъ и святъ Греческихъ албо якихъ иншихъ въ набоженствѣ заказовати мѣли, о чомъ есмы ани мыслили; але учинилисмы то для порядку и справъ речи посполитой. Прото волно есть и маетъ быти каждому набоженства и вѣры своей уживати, свята святити и обходити; а за тое они ни якой трудности, пренагабаня, шкоды и грабежи терпѣти не маютъ, кгдыжъ люде Греческого закону до т... поправы календаря нового, безъ призволенья старшего патріарха своего, кгвалтомъ примушани быти не маютъ. Для чого хочемо мѣти и приказуемо вамъ, абысте имъ святъ ихъ обходити и святити не забороняли, переказы и перенагабаня, ани грабежу за тое, ани деспектовъ жадныхъ не чинили, постерегаючи того, абы покой и згода межи розными въ вѣрѣ и набоженствѣ захованъ былъ; кгдыжъ есмо еднако повинни всѣхъ подданыхъ нашихъ правомъ згодою змоцнеными заховати и подъ обороною покою, отъ насъ господара поприсягненою. Чего яко въ всѣхъ справахъ, такъ и въ томъ никгды ни чимъ нарушати не хочемо. Писанъ (яко вышъ) року отъ Нароженья Сына Божего 1584, — мѣсяца генваря 21 дня. Стефанъ, король. Левъ Сапѣга, писаръ».