На лясных складах у Рызе

На лясных складах у Рызе
Верш
Аўтар: Кастусь Езавітаў
12 траўня 1926
Крыніца: http://rv-blr.com/pages/versh_view.jsp?vershId=2522

Спампаваць тэкст у фармаце EPUB Спампаваць тэкст у фармаце RTF Спампаваць тэкст у фармаце PDF Прапануем да спампаваньня!




За заборамі шэрымі, старымі,
На пакрытых карою дварах
Стаяць клеткі дашчок веліканамі
Ў сьветла-жоўтых смаловых радах.

Смачна пахнуць брусочкі шафранныя!
Над апілак гарой дрыжыць пар…
Пілавалі вас рукі старанныя —
Агалілі агромны абшар.

Зь беларускіх лясоў, з Панадзьвіньня,
Доўга плылі цяжкія плыты.
Намазолілі рукі ды сьпіны
Нашы, ў шэрых сярмягах, браты!

Свайго Краю дабро, за чужацкі алтын,
Ад бядноты сваёй прадалі.
Дроў ня мае свой брат-селянін,
А к чужым горы лесу сплылі!

Абкрадаюць нас ўсе! Цягнуць кожны ў свой бок.
За нажывай да нас едзе ўсяк!
Ў гаспадарку сваю, беларус, зрабі крок!
Пакажы ўсім чужынцам кулак!

(12 траўня 1926 г., Рыга)