На ростані (1924)/II/Вецер

← Замчышча

Вецер Верш Аўтар: Уладзімір Жылка 1924 год

Сёмуха →

Іншыя публікацыі гэтага твора: Вецер (Жылка).

Прапануем да спампаваньня!

ВЕЦЕР.

Вецер урваўся праз весьніцы,
Пыл на двары крутануў,
„Вер, што жаданае здзейсьніцца!“ —
Ласьцячы вуха, шапнуў;

Шпаркі і сьмелы ў захопленьні
Лёгка праскочыў праз плот;
Штосьць зашумеў між каноплямі,
Борзда мінуў агарод;

Там-жа, дзе жыта з пшаніцаю
Сьпеляць свае каласы,
Блутаў, віхрыўся дурніцаю
І перабег на аўсы;

Лесу пабачыўшы цёмнага
Хмура-задумны аблік,
Быццам спужаўся таёмнага,
Сьцішыўся, зьменшыўся, зьнік…