Описанье и оборона събору руского Берестейского/Оборона/12
| ← Роздѣлъ 11 | ОБОРОНА СЪБОРУ БЕРЕСТЕЙСКОГО Аўтар: Пётр Скарга 1597 |
Прапануем да спампаваньня!
Пересторога на потвары противниковъ собору Берестейского.
Роздѣлъ 12.Перестережитесе, прошу, на неупреймость (и кламства), и пострахи, и потвары противниковъ собору (светого) Берестейского.
Мовять, ижъ «соборъ свои у Берестью мели и одъправили“. То спросные вымыслы и невъстыдъ. Не соборъ, на которомъ епископи заседають, але сеимикъ якийсь, одь короля его милости заказаныи, зъ маршалкомъ новокръщеньцомъ мели. Не въ церкви, где соборы бывають, але въ дому, въ которомъ за старость геретыцькихъ блюзнеръства противъ Богу мешкали и теперъ мешкають. Не зъ особами, до собору належачими, але зъ (Ариянами новокръщенцами и розными) геретыками и зъ выволанцами, и съ посторонных иныхъ королевствъ збегами, и зъ выклятыми сполки мели. Хтожъ имъ тотъ соборъ зложилъ? Никиѳоръ, чили Балабань, чили Копыстенский? Ни одинъ съ тыхъ. Зложилъ соборъ митрополитть, за дозволеньемъ короля его милости. До негожъ се скупить, и его за голову меть на соборе мели, которые до собору належали, яко то добрые и светые епископы учинили. Але (речешь): «были тежъ тамъ два владыкове»? (Правда), были: але не на соборе, одно на собранью геретыцкомъ. Были: а старшого своего и собору (властного), оть него зложоного, заперлисе, и властьного подпису рукъ (и печатей) своихъ отступили. Тые два собору учинить не могли. Бо того жадное право, ани Божое, ани церковное, ани жадный розумъ не допущаеть, абы тотъ соборъ починалъ и справовалъ, хто его не складалъ; абы два нижние болшъ важили, нижли митрополить съ петма владыками; абы сынове на отца право ставили, а подъданые зверхнего своего преложоного судити мели.
«Але было тамъ поповъ не мало и чернѣцовъ». Бы ихъ было и наболей, до собору (тые вси) одное одробины права не мають. Самыхъ то
епископовъ (власть и) трыбуналъ, и
нихто тамъ голосу не маетъ, одно тые церковные сенаторы и справъцы люду Божого. Што все каноны и права церьковные указують.
«Але тамъ былъ отъ патрыяръхи Никифоръ». Былъ (Никифоръ): не отъ патриархи, одно яко збегъ и злочинъца, который Розвана до Волохъ впровадилъ (и на людъ короля его милости навелъ,) и тамъ, (за щастьемъ короля его милости, отъ господара Волоского и отъ войска его королевьское милости посполъ зъ Розваномъ поиманый, (и до везенья господара Волоского посажоныи въ Хотиню,) съ которого везенья утекъ, (и отъ господара Волоского здрайцою названый, которого се и теперь у его королевское милости упоминаеть, и абы былъ выданъ, яко збегъ и здрайца его, домагаеть и просить, для чого) и отъ короля его милости прыпоручоный есть. А такъ соборомъ тая схажка в каменицы Берестейской зватисе, ани жадныхъ справъ соборовыхъ отправовать не могла.
«А дано, дей, тамъ клятву на митрополита и на иные владыки, на томъ каменечномъ, зъ геретыковъ собранымъ зборищу». Подобно дано: але то такъ важить, яко кгды бы (подданыи пана своего), попъ єпископа своего, (мещанинъ воита своего выклиналъ, або кгды бы епископъ патрыярху, або патрыярха папежа до себе позывалъ и выклиналъ! О, неряде! Блюжненье тамъ было, не клятва! Бо тымъ мечомъ не свецкие, не подданые духовные, але навысъшая моцъ владаеть. О томъ глупъстве шкода болшъ мовить! Болшеи дивуюсе, жъ се такий безърозумныи хто найдуеть, который той клятве моць и важность приписуєть.
«Але Никиѳоръ мелъ порученье отъ патрыярхи, абы ихъ выклялъ». Не мелъ, ани того показалъ, (кгдыжь Никиѳоръ давно съ Царогороду утекъ, и тутъ се часъ немалый въ Волоской и Мультаньскои земли блукалъ, мешаючи речъми, и зъ неприятельми короля его милости пана нашого и отчизны нашое переставалъ, и непрыятели на насъ поджигал и наводилъ, —а въ тои клятве) жадного правного поступку чинить не смелъ! Бо бы подъ тытуломъ патрыярхи тая клятва была. Але жадное головы и зверхности (въ той клятве) не въспомнено. Абы добре патрыЯриха владыки выклялъ, тогды вжо старший надъ патрыярхою папа (Рымский) розгрешилъ. Патрияръше кгды папа и Петра светого столица моцъ одоиметь, ужо жадъное духовное власти не масть.
«Прокляли владыки, и владыцства им взять и скинуть ихъ зъ достоенствъ ихъ казали». Казали: але який судья, такое тежь росказанье. Свецьские духовную, подъданъные королевскую моцъ собе приписують.
О, нестатку! Безъ суду яко хто тратить маетъ свою достойность? Азажь тамъ власные судьи ихъ были? Были (Арыяни, новокрыценицы, атеисты иные розьные) геретыки, которые не только владыкомъ, але и всимъ нашимъ епископом, ради бы епископие выдрали (и веру повшехную Рымскую и Рускую загубили и выкоренили). Еремия (патрияръха, хотя рекомо власный судья былъ) коли туть былъ, однакъ, безъ дозволенья и листовъ короля его милости, яко подавъцы и оборонъцы всихъ владыпъствъ, жадного зъ местьца рушыть не смелъ. А тые люди свецкие, упорные, не маючи моцы жадное, ани мниманое, ани малеваное, смеють се въ такъ великие урады папеские и королевские вдавать!? О, смелости и вшетечности безбожная!
«Але се списують, и великая ихь громада, и много простыхъ людей до себе намавяють и бунтують». Не бойтесе! Марка то Еѳеского геретыцкие
штуки! Кгды явною правдою, и дыспутацыю на соборехъ з учоными презвитеръми Божыми, и пророки отъ (Пана) Бога послаными, и выводами съ писма
светого и докторовъ не выграваютъ, въ куте передъ поспольствомъ свое речы заочне ставятъ и моцнять, до розруху и тумульту неведомые простаки, и до бунътовъ на урады, отъ Бога постановеные, людъ невиньный прыводечи. Лацно то попомъ, и бурмистромъ Рускимъ, и ремесникомъ, и невестамъ, и иному мотлоху [у]давать: «владыкове заклетые, до Латины прыступили, стережытесе ихъ, ани имъ отдайте послушенство». Бо тые вси добре розумеють, и на томъ се знаютъ, што клятва, хто ею владнетъ, хто ее даеть, и для которыхъ прычинъ быть может? Не ведають тые, яко розная есть моц митрополите отъ владыковъ, и владыковъ отъ поповъ; не ведають, што соборъ, што не соборъ, хто правие и правдиве выклятый, а хто не выклятый, хто ересникъ, а хто правоверный? Того тые простаки не ведають.
Такъ чинили сресники, и онъ Диоскорись, который на Еѳезский соборъ тисечу мнихов привелъ, которыми соборъ розгромилъ, и складали з урядовъ кого хотел; и Ѳлявиана, патрыярху Царогородского, зъ ними забилъ, и иные епископы помордовалъ, и броилъ бы былъ далей[1]....
Печатано съ единственного старопечатнаго экземпляра, принадлежащаго Виленской Публичной Библіотеки.
- ↑ на этомъ словѣ, помѣщенномъ въ кустодіи, прерывается старопечатный единственный экземпляръ, принадлежащій Виленской Публичной Библіотекѣ. Сравнительно съ Польскимъ текстомъ, недостаетъ листика или двухъ страницъ, съ нѣкоторымъ, быть может, переходомъ и на Третью страницу