Пад родным небам (1922)/Грымоты й цішы/На сьмерць А. Бурбіса

← На біблійны лад

На сьмерць А. Бурбіса Верш Аўтар: Змітрок Бядуля 1922 год

Юда жэніцца →

Іншыя публікацыі гэтага твора: На сьмерць А. Бурбіса.

Прапануем да спампаваньня!

НА СЬМЕРЦЬ А. БУРБІСА.

Яшчэ адна, яшчэ адна ахвяра
Пашла туды —ў харомы цішыні…
Пад гудам бур, пад чырваньню пажараў
Правёў баец гады свае і дні.

Зашмат іх шло, зашмат іх шло ў магілы
Ў расквіце лет, зараньня, без пары,
Яшчэ адна, як пломень, згасла сіла
Пад абрусом сьпяваючай зары.

Пашоў баец у князьства сьветлых ценяў,
Пад златаблеск адвечных курганоў.
Яго душа пад зьяньнем кос-праменьняў
Спачын знайшла пад вэльмам тайных сноў.

А не знайшлі жывыя ў нас спачыну,
Якім жыцьцё судзіла той-жа шлях.
У памяць тых, хто без пары загінуў,
За Беларусь падымем вольны сьцяг!

1922 г.