Прывілей габрэям (1388)

Прывілей габрэям Дакумэнт Аўтар: Вітаўт 1 ліпеня 1388 году Крыніца: «Акты Западной России», т. I, 1846, стар. 23 — 26, № 9

Прапануем да спампаваньня!

Во имя Божіе, станься. Мы Александръ, або Витовть, зъ Божей ласки великій князь Литовскій, и дѣдичъ Городенскій, Берестейскій, Дорогицкій, Луцкій, Влодимерскій и иншихъ, знаменито чинимъ тымъ нашимъ листомъ, нинѣшнимъ и потомъ будучимъ, кому // будетъ потреба того вѣдати, або чтучи его слышати. Умыслили есмо съ паны радами нашими и дали права и вольности всей Жидовѣ Вышейменской, мешкаючимъ въ этомъ панствѣ нашомъ, которыи суть нижей въ томъ листѣ нашомъ выписаны. Напервѣй, уставили есмо, ижь за пѣнязи, рахуючи, або в иншой речи, которая ся тычетъ парсуны жидовскоѣ напротивку жидовѣ, двумъ хрестьяномъ, а третему жиду, который бы ся добрѣ ховалъ въ законѣ своемъ жидовскомъ, свѣдетство допущено маетъ быти. Тежъ, естли бы хрестьянинъ нагабалъ жида, мовячи, ижь бы ему свою заставу заставилъ, а жидъ бы ему того запрелъ, а хрестьянинъ бы ему не хотѣлъ вѣрити: жидъ, присягши на важности оноѣ заставы, а за ся присягши хрестьянинъ, досвѣтчилъ бы то на него, — маетъ ему то заплатити. Тежъ, естли бы жидъ хрестьянину, не давши свѣтковъ, рекъ, ижь бы позычилъ тыи заставы, а онъ бы запрелъ: то хрестьянинъ маетъ заплатиги, а любо присягою ся очистити. И тежъ могъ бы жидъ взяти, именемъ заставы, всякіе речи, которые бы были ему заставлены, которымъ колвекъ именемъ были вымовени, а о тыхъ-то речахъ жадного габаня не чинечи, вынявши одноѣ кривавоѣ мокроѣ хусты светоѣ костельноѣ, которыхъ жаднымъ обычаемъ ни один пріймовати не маетъ. Тежъ, естли бы хрестьянинъ нагабалъ жида о заставу, которую маетъ жидъ, которая бы ему была черезъ злодѣйство, або черезъ кгвалтъ взята: на тую истную заставу жидъ маетъ присягнути, яко не вѣдалъ, коли ему вкрадено, або кгвалтомъ взято, а тое у той своей присяги вымовити маетъ, какъ ему тая застава заставлена... очистивши ся хрестьянинъ маетъ половицу лихвы платити, которая бы ему до того часу примножила. Тежъ, естли бы черезъ упадъ, пожоги, або злодѣйства, або через кгвалтъ, речи свои (съ), заставлеными заставами утратилъ бы, а хрестьянинъ, который бы ему заставилъ, всякій не маетъ жида габати: жидъ своею властною присягою будетъ очищенъ. И тежъ, естли бы жидове межи собою незгоду або сваръ почали, судья мѣста нашого жадного пересуда на нихъ не маетъ брати, але мы только; а любо нашъ староста будетъ ли ихъ судити, а на нихъ бы которая вина або проступка пришла: тотъ судъ маетъ быти на насъ захованъ. Кътому, естли бы хрестьянинъ жиду рану нѣкоторую задалъ, винный таковый маетъ вины заплатити, чимъ маетъ намъ чоломъ бити, а ранному маетъ досыть вчинити, подлугъ ранъ его, яко шляхтичу. Тежъ, естли бы хрестьянинъ жида забилъ, маетъ быти каранъ, яко винный; а всякіе речи, рухомые або нерухомые, мають быти въ нашей моцы. И тежъ, естли бы хрестьянинъ жида вдарилъ такъ, яко бы криви не розлилъ: маетъ на немъ вина быти, водлугъ обычая нашое земли, а вдареному и ображоному маетъ досыть вчинити, яко шляхтичу, а естли бы пѣнезей не мѣлъ, тогды за проступок, яко право найдетъ, маеть быти каранъ. И тежъ, естли бы жидъ черезъ нашо ѣхалъ; жадный ему нагабаня чинити не маеть; а естли бы которые речи крамные везъ, маетъ мыто платити черезъ вси мыта положоные, // какъ и иншые даютъ мыто. Тежъ, естли бы жидове, подлугъ а своего обычая, нѣкоторого жида умерлого, от мѣста до мѣста, от повѣта до повѣта, або от одное земли до другое земли везли бы черезъ мыта: ничого на нихъ мыта не мает брано быти; хочемо, естли бы такъ заисто мытникъ што бралъ на нихъ, иж бы яко розбойникъ каранъ былъ. Тежъ, если бы хрестьянинъ копища ихъ возилъ, або кгвалтомъ находилъ: хочемо, ижъ бы, подлугъ а обычая нашое земли, правъ нашихъ, былъ каранъ; а вси именья его мають на насъ спасти. Тежъ, естли бы хто какъ на школу жидовскую металъ, тоть маетъ старостѣ нашому заплатити два фунты перцу. Тежъ, естли бы который жидъ былъ найденъ судьи своему у винѣ пѣнежной, або въ иншой которой, которая здавна уложона, то маетъ заплатити. Тежъ, естли бы жидъ, черезъ вызнанье своего судьи, былъ бы позванъ къ суду, первый и другій раз не пришолъ бы: маетъ заплатити вину, за оба-два разы, которая уложона; а естли бы къ третему вызванью не пришолъ, которая вина положона для впаметанья, судьи маетъ заплатити. А естли бы жидъ жида ранилъ, вину судьи своему, водлугъ обычая земского, (маетъ) заплатити. Тежъ уставили есмо, ижъ жаденъ жидъ не маетъ присягати на десятером Божихъ приказаній, то есть, книги Мойсеевы, только о великой речи, которая бы была гривенъ серебра литого, або будетъ передъ обличностью нашою вызнана; а маетъ присягати перед школою у дверей, И тежъ, естли бы жида забито, а черезъ свѣдетство не могъ довести, своимъ пріятелемъ, который бы его забилъ: естли бы могъ, въ пытанью, нѣкоторого подозреного мѣти, мы жидомъ напротивку подозреного хочемъ обронцою быти. И тежъ, естли бы хрестьянинъ нѣкоторый жидовцѣ рукою кгвалтовною мѣлъ што вчинити, абы вдарилъ, маетъ быти каранъ, подлугъ права нашое земли. И тежъ: судья жидовскій, которая ся дѣетъ межи жиды пригода, къ суду не маетъ передъ себе приводити, оли жъ бы черезъ скаргу былъ наведенъ. Тежъ, естли бы жидове гдѣ собѣ выбрали, у школѣ, або гдѣ колвекъ, тамъ мають служены быти. И тежъ, естли бы отъ жида хрестьянинъ заставу свою вызволилъ такъ какъ бы ему лихвы не заплатилъ, а тымъ — то лихвъ естли бы черезъ мѣсецъ не далъ: и (къ) нимъ примножають другіи лихвы. Тежъ жадного въ дому жидовскомъ, не хочемъ гостемъ мѣти. И тежъ, естли бы жидъ на имѣніе, або на листы пановъ знаменитыхъ пѣнязей бы позычилъ, а того черезъ свои листы, або печати досвѣдчилъ бы: мы жидови, намѣсто иншихъ заставъ, имѣніе заставленое назнаменуемо, а ему того имѣнія, напротивку кгвалтови, хочемъ боронити. Тежъ, естли бы который дѣтя жидовское окормилъ, тотъ яко злодѣй маетъ каранъ быти. И тежъ, естли бы жидъ взялъ у хрестьянина заставу черезъ часъ одного року держалъ бы; естли бы важности пѣнезей позычоныхъ не вчинила, абы жидъ судьи своему тую заставу оказалъ; естли бы тая застава не добра была, старостѣ нашому маетъ вказана быти; а потомъ жидъ ее добровольнѣ маетъ передавати, естли бы тая истная застава, нижьли бы // рокъ пришолъ, своему была судьи вказана; а естли бы застава въ жида черезъ рокъ день одинъ, была, потомъ жадному жидъ не маетъ отповѣдати. Надъ то, хочемъ, ижь бы жадный жида къ заплатѣ заставы его въ день святый не принуждалъ, и тежъ, естли бы хто жида, къ заплатѣ заставы его, въ день святый принудилъ, або кгвалтъ въ дому бы его вчинилъ: яко ростравца скарбу нашого окрутнѣ маетъ быти каранъ. Тежъ подлугъ уставъ папежскихъ, во имя святого отца нашого, грознѣ приказуемъ, абы на томъ жидове, остаточнѣ, въ панствѣ нашомъ уставены мѣли быти обвинены, ижъ поживають человѣчоѣ крови, кгды то есть напротивку закону и уставы, ижъ жидове посполитные мають утягати и выстерегать ся отъ посполитоѣ крови, але естли бы нѣкоторый жидъ о забитью дѣтяти хрестьянского черезъ хрестьянина былъ обвиненъ, таковый маетъ быти посвѣтчонъ трема хрестьяны, а трема жиды добрыми; а кгды бы жидъ был посвѣтчонъ, тогды жидъ виною маетъ быти каранъ за проступокъ; а естли бы свѣтки преречоные невинность его посвѣтчили бы: хрестьянинъ вину, которую жидъ мѣлъ терпѣти, немилостивѣ маетъ платити. Тежъ уставили есмо, ижъ жидове коней посполитыхъ, въ день только (въ) заставу мають брати, явно; а естли бы нѣкоторый конь у жида, краденый, черезъ хрестьянина былъ бы найденъ: тогды жидъ властною присягою очистити ся маетъ, рекучи: «жемъ того коня въ день взялъ, который же за пѣнязи мои есть заставленъ », а тогды тотъ жидъ отъ тоѣ рѣчи будетъ выбавенъ. И тежъ, ижъ бы мынцарѣ, въ княжствѣ нашомъ уставлены, жидовъ съ фальшивыми пѣнезми, або зъ речьми иншими, сами, через посла нашого воеводы и тежъ черезъ мѣщанъ, которымъ-колвекъ обычаемъ, таковыхъ имати не смѣли бъ. Тежъ, естли бы жидъ нѣкоторый, принужоный великою потребизною, часу ночного волалъ бы, а естли бы хрестьяне, ему ко поможенью не прибѣгли къ воланью: всякій сусѣдъ, и тежъ жидъ шеляговъ маетъ заплатити. И тежъ уставили есмо, ижъ бы жидовѣ продавали всякую речь доброволнѣ; имають куповати и хлѣба ся дотикати, яко и хрестьянинъ; а заказуючіи имъ вину намъ мають заплатити. И тежъ: вси, которые, артыкулы дали есмо имъ, на томъ привильи нашомъ выписаныи, потвержаемъ то имъ на вѣчные часы, и печать нашу казали есмо привѣсити. Стало ся есть и дано въ Луцку, въ октаву святого Ивана Крестителя, подъ лѣты Божего нароженя тисяча триста лѣтъ, осмдесятъ и осмъ лѣтъ. А при томъ были тые свѣткове: князь Θедоръ, воевода Луцкій, будучій того часу, Жимонтъ рыцеръ..., а Луба, бояре зъ Литвы, и тежъ Минкгайло изъ Ошмены, и тежъ зъ Литвы иншіе бояре.