Смерць тырана

Смерць тырана Верш Аўтар: Язэп Пушча 1953 Крыніца: https://knihi.com/Jazep_Pusca/Viersy.html#chapter58

Прапануем да спампаваньня!

Нязвыклы дзень: тыран сканаў,

На твары чорная сляза;

Яе нікому не злізаць.

З касою смерць каля вакна.

Яна вартуе, каб не ўстаў

Тыран расправу учыняць.

Сляза на твары, а чыя?

Сказаць пра гэта жах і страх.

Народная сляза і кроў:

Бацькоў, і матак, і дзяцей.

Ён адбіраў жыццё ў людзей

І куляй цэліўся у скронь.

Вартуй жа, смерць, ўсю ноч і рань,

Каб больш не ўстала яго здань.