Сонечнымі сьцежкамі (1925)/Сузор’і/Ў музэі залатую бранзалетку…

← ⁂ Мятнуўся небасхіл…

⁂ Ў музэі залатую бранзалетку… Санэт Аўтар: Алесь Дудар 1925 год

⁂ Нікому ня буду верыць… →

Іншыя публікацыі гэтага твора: Ў музэі залатую бранзалетку…

Прапануем да спампаваньня!

∗     ∗
∗

Ў музэі залатую бранзалетку
я бачыў за празрыстым шклом —
яе, пад старажытным курганом,
пазелянеўшую знайшлі малыя дзеці.

І ў тыя дні расьлі на полі кветкі…
І ланцужком, сатканым з васількоў,
стары мастак прывычнаю рукой
аздобіў залатую бранзалетку.

Мастацкі дух ніколі не памрэ.
Не пахаваць яго пад курганамі,
ня вычарпаць гадамі і вякамі.

Яму ў агні пякельным не згарэць.
Ён вырвецца з багны разводзьдзем буйным рэк
і загарыцца зноў бліскучымі агнямі.