Сонечны паход (1929)/Ці-ж можна тысячамі зьмераць…

⁂ Ці-ж можна тысячамі зьмераць…
Верш
Аўтар: Міхась Чарот
1929 год

Іншыя публікацыі гэтага твора: Ці ж можна тысячамі зьмераць…

Прапануем да спампаваньня!

∗
∗ ∗

Ці-ж можна тысячамі зьмераць
Шлях, пройдзены ў такім жыцьці,
Таму, хто ў сэрцы мае веру
У новы вольны сьвет прыйсьці.

Хто шчасьце ў замеці ружовай
Мог вышукаць, забраць хто мог,
У бойку йсьці хто быў гатовы, —
Сябе ніколі не сьцярог.

Прабеглі дні… Ніхто ня верне!
Тут не патрэбны тыя дні.
Няхай кітайскія кавэрны
Запаляць нашыя агні.

Няхай матросы-англафлотцы
Пабачаць сьветлых дзён маяк,
Тых дзён, што ўчора на балоце
Мяцежна сустракаў і я.

Дняпро і Сож, Дзьвіна і Прыпяць,
Нясеце радасьць маю ўдаль,
Няхай нявольнікі ў Эгіпце
Чытаюць новую скрыжаль.

Вякамі сьвет няволю выспаў,
На крыльлях волі узьлятай!
І на далёкай чорнай высьпе
Сягоньня думкаю — я там.

Юнацтва — мудрасьці развага, —
Ня страшны мне ні боль, ні сьмерць…
Жаданьне вечна поўна смагі —
Люблю я ў сьветлы дзень глядзець.

Ці-ж можна тысячамі зьмераць
Шлях, пройдзены ў такім жыцьці
Таму, хто ў сэрцы мае веру
У новы вольны сьвет прыйсьці.