Старонка:Выбраныя вершы (Хадыка, 1932).pdf/84

НАД БОРАМ ПЕСЬНІ

Галінкай правяла па твары
Вясна марудлівых далін.
Іду я ў поле пець і марыць
Аб ураджайнасьці зямлі.

Прастор і сонца. Волі многа…
Людзкія песьні. Гоман дрэў.
На той гары крутой,
За логам,
Дом панскі некалі гарэў.

Ад сковаў паднявольнай працы
Тут людзі узрушаны былі
І выйшлі з ворагам змагацца
І ў бойцы той перамаглі.

Падзей тут многа адбылося,
Крывёй паліты кожны сьлед…
Вялікую я слаўлю Восень,
Што запаліла ўвесь сусьвет.