Старонка:Выбраныя вершы (Хадыка, 1932).pdf/95

Гэта старонка не была вычытаная

ГАРМАНІСТ.

Над борам змрокі для маніст
Рабіну ніжуць на аборкі.
Сялом вясковы гарманіст
Ідзе к дзяўчатам на вячоркі.

Бадзёрасьць звонкае хады
У кроках дробленых гамоніць,
І рэжуць „барыню“ лады,
Вясёлы рыпае гармонік.

Прыбег няведама адкуль
На скокі вецер зухаваты.
Глядзяць, зяхаючы ў руку,
Гульнёй разбуджаныя хаты.

Цікавы кожнаму двару
Ігрышч сьвяточныя забаўкі.
Сьвятліцу дзеўкі прыбяруць,
Пасядуць з хлопцамі на лаўкі.

Танцоры зьявяцца сюды,
І песьні скончацца ня скора…
Мы ўсе жылі ў свае гады
Агнямі любымі вячорак.