Гэта старонка не была вычытаная
Штаўффахер.
Дзе-ж Тэль? Чаму яго няма тут з намі,
Тварца свабоды нашай? Ён найболей
Зрабіў і найцяжэй перацярпеў.
Хадзем усе мы збаўцы на спатканне
І ад усіх гукнем яму вітанне.
ДРУГАЯ З‘ЯВА
Хата Тэля. У печы гарыць агонь. Праз адчыненыя дзверы — далёкі краявід.
Гедвіга, Вальтэр і Вільгельм.
Гедвіга, Вальтэр і Вільгельм.
Гедвіга.
Сягоння бацька прыйдзе. Дзеткі, дзеткі!
Жывы ён, вольны; вольныя мы ўсе!
Ваш бацька выратаваў ўсю краіну.
Вальтэр.
І я таксама быў пры гэтым, маці,
Мяне успомні. Бацькава страла
Была так блізка ля мяне і я
Не зварухнуўся.
Гедвіга (абнімае яго).
Так, ты мне ізноў
Аддадзен. Двойчы я цябе радзіла!
І двойчы я адчула матчын боль!
Ўсё скончана — вы зноў са мной, абое!
І сёння прыйдзе бацька ваш ізноў!
Манах з‘яўляецца ў дзвярах.
Вільгельм.
Матуля, глянь, набожны брат стаіць там:
Ён міластыню хоча папрасіць.
