|
Так хочацца сказаць новае нешта —
Пусьціць лявоніхай ліхія рытмы —
Засьмяяцца нябывала словам сьмешным —
Раскудлачыць разудала стыль дасьціпны…
Ой, хочацца ўтануць у строфах звонкіх —
Абняцца з кожным незнаёмым словам —
З каўшоў песьняў сьветлых выпіць самагонку —
Расшумецца ў вершы гоманам сасновым —
Зрывайцеся салаўямі, цымбалы,
У струназвоне сонцам вехацеце — —
Ці, браты, у нашым сьпеве хмелю мала,
Ці буянства мала ў песенным расьцьвеце?..
Пара вам, песьні, жніўнёвым напевам
Закалыхацца ў веснавых зарэччах —
У юнацкай Беларусі лётам сьмелым
Заірдзецца ярка на бяседным вечы.
|
