Старонка:Звон вясны (1926).pdf/5

ЗАЛАТАЯ РОССЫП…

Не, ня мне серабрыстаю хваляй
Усхліпваць у зарасьлях слоў!
Звонкія песьні у далі
Новым нясуцца паслом.

Там… сонцавей дзе на жыта
Выліў свой палкі пыл,
Сьпелая радасьць імжыцца:
Сонца зьвязалі ў снапы!

Эх, і жніво залацістае!..
Гольлем трасе маладняк, —
Песьні у поплаў батыставы
Мчаць на чырвоных канях.

Слоў залацістую россып
Звонам пасею ў лісты…
Радасьці ў першыя росы
Нам перакінуць масты!