Деонисей Збирозский, Холмъский и Бельский, владыкове обряду Руского, - въ Берестъи на день собору назначеный с дня октебра, водле старого календара, лета Божего 1596, маючы при собе послы пресветого отца Климентия 8, папы Рымского, превелебъные отцы: Яна Димитра Соликовского, архиепископа Львовского; Берната Матеевъского, Луцького; Станислава Кгомолинъского, Хелмъского, епископы, - за позволеньемъ наяснейшого Жикгимонта Третего, короля Польского и великого Князя Литовского, пана нашого милостивого, и за ведомости и позволенемъ его милости князя арцыбискупа Гнезненского, Станислава Карнъковского, яко прымаса въ томъ королевстве и навысшого въ духовенстве преложного, -
отправивши звычайные молитвы и възыванья Духа Светого, день одинъ до зачатья собору на послы короля его милости ждали, для того наболей, ижъ некоторые панове светские з великою личбою збройныхъ, яко до войны, прыехавши и часъ собору упередивши, пострахи и погрозки отцомъ згромажонымъ чинили. Ажъ дня другого, у четвергъ, зъехалисе послове короля его милости: освещеный Микола Крышьтоѳъ Радивилъ, княжа на Олыце и Несвижу, воевода Троцкій; ясневелможный Левъ Сапега, канцлеръ, и Деметрый Халецкий, подскарбий (земский) великого князства Литовского, староста Берестейский. Которыхъ превелебные отцове епископи заразъ просили, абы владою короля его милости, съ повинъности своее, на которую послани суть, опатрили покои, якобы безъ розъруховъ и гомоновъ и гуковъ и постраховъ, духовные свое справы отправить могъли.
