къ князю
КОНСТАНТИНУ КОНСТАНТИНОВИЧУ ОСТРОЖСКОМУ
Притомъ, хрестиянскій брате, здало ми ся за речь потребную положыти тутъ на остатку листъ одинъ, который писалъ до его княжецкое милости пана воеводы Киевского епископъ Володимерскій отецъ Ипатей, намавляючы его до тое згоды. На который листъ отписалъ ему неякі клирыкъ Острозскій безъименный, который и до друку естъ выданъ. Прото, абы хрестиянскій чоловекъ ведалъ, на якій листъ епископови Володимерскому тотъ-тамъ клирыкъ отписъ учынилъ, уписалемъ его тутъ слово до слова, жебы люде ведали и разсужали оба листы: бо и то тежъ не меншый фортелъ - дати выдруковати отказъ одное стороны, а на што отказано, тое утаити. Але теперъ кождый бачный хрестиянинъ, маючы предъ очыма обое писанье, латве осудити правду и неправду можетъ. А то маешъ листъ владыки Володимерского,
