торови въ правѣ, Августинови Ротундови Мелескому, и тежъ бурмистрови и радцамъ мѣста нашего Виленского.
«Дали намъ тую справу ихъ милость панове рада наша вел. княз. Лит., при насъ у войску на тотъ часъ будучи, релѣи Евангелицкой, же въ тыхъ недавныхъ часѣхъ немалый розрухъ ся сталъ въ томъ мѣстѣ нашемъ столечномъ Виленскомъ отъ тыхъ, которыи сутъ католицкой Рымской вѣры, противъ людемъ и министромъ Евангелицкого и Саского збору. Напередъ: же у друкара книги Евангелицкой науки, зъ росказанья к-з. бискупа Виленского, побрано [и] предъ костеломъ святого Яна попалены сутъ; тѣла змерлыхъ людей ку погребенью до мѣстъ ихъ, гдѣ ся ховаютъ, черезъ улицу, звлаща мимо костелъ святого Яна, носити и спѣвати при тѣлѣ змерлого католицы заказують, лжачи, сромотячи и волаючи за ними на улици, а то бы снать съ подущенья казнодѣовъ католицкихъ чинити мѣли; зачимъ и двохъ министровъ жацы изъ школы святого Яна и иншій кгмѣнъ на улици съ погребу идучихъ мало не укаменовали; а надто похвалки чинять, якобы зборы спустошити и збурити кгвалтомъ хотѣли. Што все отъ одной стороны слышачи, мусимо тежъ и другой ухо зоставити. Але если бы то такъ было, теды бысмы то зъ неласкою пріймовали, добре то бачачи, ижъ въ тыхъ панствахъ и кролевствахъ, гдѣ кгвалтомъ, огнемъ, мечемъ, а не наукою и добрыми обычайми вѣру кгрунтовати хотятъ, великое розлянье крве и знищенья зъ внутрной войны дѣются. Чого мы не одно, уховай Боже, въ посполитомъ запаленью, але тежъ и у межи особами приватымъ не радибысмо видѣли, и постерегатисмы повинни. И яко о все доброе ку розмноженью кр.
