Старонка:Русская историческая библиотека Том 07 1882.djvu/576

Пол. и того панства вел. к-з. Лит., отъ Пана Бога намъ звѣреного, зъ найболшимъ усилованьемъ и выставленьемъ здоровья нашего противъ непріателеви стараемося, - такъ бысмы того овшемъ упріймо жадали, абы всѣ обыватели всякого стану, одного Бога хвалечи, одностайне католицкой старожитной вѣры были. Лечъ ижъ Панъ Богъ то проповѣдалъ, же погоршенья быти мусять вѣку того свѣта остатнего, — прото мы никого кгвалтомъ до вѣры тиснути не хочемъ; але, ведлугъ поприсяженья нашего всѣмъ станомъ такъ Короны Полской, якъ и вел. к-з. Лит., на коронацыи нашей щасливе учиненого, покой межи розными въ релћи хотячи заховати и оного боронити, и тую повинность присяги нашей хотячи завше передъ очима мѣти, а сумнѣнье въ вѣрѣ каждого спущаючи на судъ Пана Бога Всемогущого. Кгдыжъ не одно за такимъ обовязкомъ нашымъ захованя и обороны покою въ релѣи, на особу нашу кор. отъ всѣхъ становъ обоего панства вложеномъ, але тежъ и за стародавнымъ звычаемъ того панства розныхъ въ вѣрѣ людій въ ихъ набоженствѣ терпимо, — росказуемо тогды вамъ, абысте заразомъ, скоро тотъ листъ нашъ васъ дойдетъ, явне въ недѣлю на рынку и по улицахъ въ томъ мѣстѣ нашемъ Виленскомъ обволати дали, абы во всемъ ведле способу и обычаю, здавна ажъ до тыхъ часовъ щасливого панованья нашего заховалого, спокойне ся заховали, и жадныхъ причинъ до розруховъ не давали. А еслибы кто, покой посполитый взрушаючи, упорне а своволне розрухъ якій вщиналъ, — тогды абысте такового каждого, юриздиціи вашей подлеглого, съ повинности уряду вашего до науки нашей на урядѣ задержавши, намъ о томъ знати давали конечне, иначей того подъ