ласкою нашею не чинячи. Данъ зъ обозу нашего подъ Исковомъ» и прочая, яко вышей. «Стефанъ кр. Вацлавъ Акгрипа, писаръ».
Листъ кр. его мил. теперешнего - Еремеи, патріарсѣ Константинополскому на волное отправованье справъ духовныхъ въ церквахъ и людехъ послушенства его,
въ панствахъ его кр. мил. будучихъ. Данъ зъ Вилна, року 1589,
іюля дня 15.
«Жикгимонтъ Третій, зъ ласки Божей кр. Пол. и прочая.
«Княжатомъ, паномъ, воеводамъ, кашталяномъ, маршалкомъ, старостамъ, державцамъ, княгинямъ, паніямъ, вдовамъ, урядникомъ земскимъ и дворнымъ, земяномъ и дворяномъ нашимъ, и всему рыцерству, шляхтѣ, обывателемъ панства нашего вел. к-з. Лит. и всѣхъ земль до него належачихъ. Также войтомъ, бурмистромъ, радцамъ, лавникомъ въ мѣстѣхъ нашихъ господарскихъ, княжачихъ, панскихъ и земянскыхъ, духовныхъ и свѣтскыхъ, и всѣмъ вобецъ, кому бы то належало.
«Ознаймуемы вамъ: ижъ што преосвященный Іеремѣа, патріархъ Константинополскій, зъ столици своей пріѣхалъ тутъ умысльне до тыхъ краев панствъ нашихъ, хотячи церкви закону Греческого и служачихъ въ нихъ, то есть: архіепископовъ, епископовъ, архимандритовъ, игуменовъ, поповъ, діаконовъ и иншихъ слугъ церковныхъ, подъ властію его милости будучихъ, съ повинности своей навѣдити и духовенства ихъ дозрѣти, якобы ся вшелякій справы церковный ведлугъ закону ихъ христіанского послушенства Греческо-
