безсловесныхъ, которые, за наймомъ дочаснымъ отъ пановъ своихъ, стада ихъ пасуть), - а еслиже тые для найму горкого дочасного, жебы его не потерали и шкоды, еслибы се якая въ стадѣ стала, паномъ своимъ не прыплатили, такъ цилное старане о овцахъ нѣмыхъ посполите мѣвають, — яко далеко болшей пастыромъ и слугамъ церкви Божое, которые не козы, не бараны, не быдло нѣмое, але стадо словесныхъ овецъ Христовыхъ въ порученю своемъ мають, старатисе пилно потреба, якобы въ распрошене не пришло, вѣдаючи о томъ, ижъ если бы се, чого Боже уховай, шкода въ немъ якая стала, не наймомъ дочаснымъ кождый таковый пастырь, але вѣчною погибелю души своее прыплатити бы того мусѣлъ, бо бы не за нѣмое быдло, але за оное многоцѣнное стадо, неошацованымъ скарбомъ - Кровю Христовою искупеное, мусѣлъ Пану своему личбу давати.
На што на все маючы пилное око, а иле подъ тымъ часомъ нещасливымъ, которого розмаитыхъ ересей намножилосе, а видечи яко и тые, которые не ку спасенію, але ку вѣчному затраченю, овцы Христовы съ правдивое овчарни выводечы до своихъ пустынь, великую пилность въ томъ маютъ, въ чомъ неледаяко имъ шанцуется, бо не по одной, але великими громадами стадо Христово урываючы до своее оборы плюгавое загоняють, —а овцы тежъ, яко прироженя кревкого будучы, неразмыслие, але ослѣпъ, яко дурные, творечы за па- стырми, анижли они за волками, на свою погибель бѣгуть. А пастыры зась старшіе, которые бы того догледати и той явной и великой шкодѣ забѣгати мѣли-то радою, то наукою, то писанемъ своимъ, ничого о то не дбаютъ, а праве само хоть стадо Христово на месные ятки выдаютъ.
А штожь иншого овцамъ бѣднымъ, видечы таковую недбалость пастырей своихъ, чинити было годно въ томъ розерванью? Искати пристанища якого, жебы се гдѣ-колвекъ прыгорнути могли! Вышедшы тогды зъ овчарни своее а блукаючысе по пустыни, хто ся колвекъ натрафилъ - будь то Лютарь, будь то Калвинъ, будь то проклятый Арей ебионъ, албо нурокъ, не смотречыесли пастыръ, албо волкъ, облуканые приставали, а другіе розумнѣйшые, хотяжъ не до своихъ звыклыхъ пастырей, але до иншыхъ, видечы справу добрую и порадокъ лѣпшій, быле бы отъ волковъ убѣчы, прилѣплялисе.
Штожъ было иншого намъ, бѣднымъ и горкимъ подпасычомъ, чинити?! Одно — видечы недбалость и нечуйность пастырей нашихъ головныхъ — до лѣншого ряду и до оное старожитности и згоды светое, которая за продковъ нашихъ бывала, вернутися. О чомъ кгдысмы, водлугъ повиннос[т]и нашое, радить и промышлять почали, вмѣсто подякованя и вдячности за старане нашо, у великую ненавис[ть] и въ неласку до своихъ же прышли. Также не толко словъ ущипливыхъ писма вшетечного насмотрѣлися есмо и наслухали[ся], але наконецъ и погрозокъ и небезпечности здоровья нашего увездѣ полно. О которое мало стоимъ, бо, для правды Божое, и того положыти не страхаемся.
А ото - нажалоснѣйшая! Ижъ всимъ геретическимъ и дъяволскимъ сектамъ волно старшымъ о порадку межы своими промышляти; людей православія хрестиянского до своее вѣры наворочати то словы, то писмомъ, то сынодами; наконецъ волно Пана Бога блюзнить и противъ превѣчному маестатови Сына Божего писма
