Ф. АЛЯХНОВІЧ.
КАЛІСЬ.
Сценічны абразок у 2 актах.
АСОБЫ:
ЯГОР ІВАШКА — малады работнік.
ЛЮДВІКА — маладая дзяўчына.
МАТКА Людвікі — прачка.
СУСЕДКА.
I НЕЗНАЁМЫ.
II НЕЗНАЁМЫ.
АКАЛОДАЧНЫ.
ХЛАПЕЦ.
Работнікі, салдаты, поліцыя.
АКТ I.
Пасярэдзіне дзьверы са шклянымі шыбамі. З абадвух бакоў дзьвярэй вокны, праз якія відаць вуліца. У левай і правай кулісе па адных дзьвярох. З левага боку пры вакне доўгі стол да прасаваньня. Пры правым вакне канапа. 3 левага боку пры дзьвярох шафа з бялізнай, з правага, напроціў, невялічкі столік. Там і сям крэслы. Вакяніцы зачынены.
Рэч дзеецца ў 1905—6 годзе.
ЗЬЯВА 1.
МАТКА — ЛЮДВІКА.
Матка (сядзіць, п‘е гарбату са сподачка). Не падабаецца мне наш новы кватарант!
Людвіка (прасуючы). Чаму, мама?
Матка. Бо якійсь… без парадку. Вяртаецца позна ўначы… Няма ведама дзе працуе…
Людвіка. Ён-жа казаў, што на фабрыцы…
