Старонка:Янка Купала. Збор твораў (1925–1932). Том 1.pdf/246

ЯК ТУТ ВЕСЕЛА СЬПЯВАЦІ?

Як тут весела сьпяваці,
Думкай весяліцца,
Калі ў беднай маёй хаце
Сонца жыць баіцца?

Калі дзе ня йду гаротны,
Ня маю прывету,
Калі мой пагляд маркотны
Ня бача прасьвету.

Чорнай долі суд няправы
Не дае спакою;
Зоры шчасьця, зоры славы
Ня льсьняць нада мною.

Не заходзе ка мне ў госьці
Мілая пацеха,
Не нямее людзкай злосьці
Расшальное рэха.

Ў паніжэньні, ў паняверцы
Жыцьця хвілі трачу,
Толькі плача маё сэрца,
Песьня мая плача.

---