МІКІТА
Якія — старыя, ці новыя? старыя во дзе — у гэтых портфэльчыках.
НАЧАЛЬНІК
Старыя потым раскумекаем, — давайце новыя.
МІКІТА
Оей! Оей! Польскі дакумэнт трэба паказваць. Каб я лепей скрозь дна праваліўся! (Дастаўшы дакумэнт з-за пазухі, да НАЧАЛЬНІКА). Во ён гэты, меджду протчым, дакумэнт. (Набок). Каб яго калядны пярун спаліў!
НАЧАЛЬНІК
(разглядаючы дакумэнт)
Польскі?
МІКІТА
Зусім польскі і з усіх бакоў польскі. (Набок). Каб яго за Буг вынесла, меджду протчым!
НАЧАЛЬНІК
Хто можа прачытаць?
СЬПІЧЫНІ
Пазвольце, таварыш, я прачытаю. (Чытае). „Оказіцель нінейшэго Нікіціуш Зносіловскі служы пшы Комісарыяце поліцыі мяста Мінска, яко доносіцель“.
МІКІТА
„Яко розносіцель“, Гэнрых Мотавіч!
СЬПІЧЫНІ
Паложым, ня „яко розносіцель“, а „яко доносіцель“, — чорнае на белым стаіць.
НАЧАЛЬНІК
Ператлумачце дакумэнт.
СЬПІЧЫНІ
„Паказчык гэтага, Нікіцій Зносілов, служыць у Менскім Камісарыяце поліцыі даношчыкам“.