Гэта старонка не была вычытаная
АКТ ПЕРШЫ
Абшырная сьвятліца. Направа ад публікі вокны ў сад, бліжэй да оркестру — стол; каля стала — лавы і табурэцікі, над сталом — вісячая недарагая лямпа, на сьцяне — абразы. Налева — дзьверы ў сенцы, бліжэй да оркестру — куфар. Напроці — сьцяна і дзьверы ў бакоўку (каморку); справа пры сьцяне ад бакоўкі — ложак, засланы коўдрай, у галавах высака накладзена падушак; налева — у кутку — печ; на сьцяне стрэльба, старасьвецкі з гірамі гадзіньнік і некалькі тандэтных малюнкаў.
Час — асеньні вечар перад пакровамі“.
Час — асеньні вечар перад пакровамі“.
ЗЬЯВА I
ПАЎЛІНКА (адна)
Стройная і досыць прыгожая дзяўчынка. Адзеўшыся ў недарагую крамніну, але чысьценька; бяз хусткі — у валасох колькі грабеньчыкаў. Сядзіць на ложку і пільна шые крамны кафтанік. Як падымаецца заслона — Паўлінка пяе.
Ой, пайду я лугам, лугам, |
(Перастаўшы пець)
Э-э! штось не пяецца сягоньня. Неяк сэрцайка трасецца, як-бы хто яго зьнячэўку перапужаў. А мо‘ гэта песьня вінавата? Даліпантачкі, аніяк не магу сама з сабой да ладу прыйсьці. А ну, на шчасьце зачну другую. Якую-ж бы тут? Ага!..
(Пяе)
Дый чаго-ж ты, дуб зялёны, |
(Пяючы, падходзіць да вакна і паглядае, пасьля ізноў садзіцца).