Старонка:Янка Купала. Збор твораў (1925–1932). Том 3.pdf/285

МАЦЕЙКА

Вып‘ем па адной!

КАЦЯРЫНКА

А пасьля і па другой!

МАЦЕЙКА

(абняўшы Кацярынку, прыпявае)

А, дзевачкі, і я ваш!
Пойдзем разам на кірмаш,
А з кірмашу дадому,
Ды ў ярную салому!

КАЦЯРЫНКА

(таксама)

Па саломе качалася,
Нічога мне ня сталася;
Зялёнае сена —
Яно мяне зьела.

МАЦЕЙКА

А цяпер вып‘ем па другой!

КАЦЯРЫНКА

А пасьля і па трэцяй!

МАЦЕЙКА

Дзяўчыначка чарнаброва
Паехала ў лес па дрова,
Паехала чорным бычкам,
Завязаўшы пастол лычкам.

КАЦЯРЫНКА

Я на ганачку стаю,
Сьлёзы коцяцца;
Дзеўкі замуж ідуць
І мне хочацца.

МАЦЕЙКА

А цяпер вып‘ем па трэцяй!