Старонка:Янка Купала. Збор твораў (1925–1932). Том 6.pdf/273

ДЗІЦЯЧАЕ

1

ЛЯВОНІХА

Ой, лявоніха, гулянка, гульня!
Галасістая бяседа твая.
А мы, дзеткі, усе здольненькія
Пяём песенькі вясёленькія.

Як маленькай я ў матулькі жыла,
Як вішанька, у садочку цьвіла,
Цьвіла, цьвіла ды пацьвітывала
Лемантарык свой пачытывала.

Як прышла я ў дзіцячы садок,
Пайшла з дзеткамі ў танок, у танок.
Я гуляю тут пагуліваю
За работкай недакучліваю.

Як вішанька у садочку цьвіту
І навукі ўсе лаўлю на ляту, —
Я рысую і пачытываю,
Раблю цацкі і папісываю.

ЮРАЧКА

1

Ой ты, Юрачка,
Што ня вучышся?
Так да невукаў
Ты далучышся.