Статут ВКЛ (1566)/14

← РОЗДѢЛЪ ТРЕТІЙНАДЪЦАТЬ, О ГРАБЕЖОХЪ И НАВЕЗКАХЪ

РОЗДѢЛЪ ЧОТЫРНАДЦАТОЙ О ЗЛОДѢЙСТВѢ ВСЯКОГО СТАНУ 1566

ФОРМУЛЯРИ →

Прапануем да спампаваньня!

АРТЫКУЛЪ 1.

Хто бы въ кого лице зосталъ.

Коли бы хто лице свое и речы краденые въ чыего слуги або подданного засталъ, такъ на дѣдизнѣ его яко и инде гдѣ кольвекъ; тогды такового человѣка лицованого маеть вести до пана его, просити зъ нимъ справедливость. А естьли бы ему справедливости не вчинено; тогды тотъ, при чіемъ человѣцѣ лицо зостато будеть, повиненъ о то передъ врядомъ нашимъ отказывати и того злодѣя своего передъ судомъ нашимъ поставити. А естли бы оный злодѣй втекъ зъ рукъ его або оное лицо стратилъ, а передъ судомъ не постановилъ, а лица не положилъ; тогды будеть повиненъ оную шкоду заплатити, на чомъ онъ присягнетъ, або слушный доводъ учинитъ, што ему при ономъ лицы будеть згинуло. И тежъ коли бы што въ кого вкрадено, а видитсе ему шкода отъ которого села, а шкодника своего не вѣдаетъ; тогды маеть выпросити право въ томъ селѣ. А естли бы далъ о то всему селу вину; тогды три мужи зъ оного села, которых онъ оберетъ, мають присегнути, якъ в том селѣ шкодника его не вѣдають, а пакли бы о то не присегнули, тогды оное село все оную дають, а пакли бы о то не присегнеули, тогды оное село все оную шкоду всю тому шкоднику маеть платити, а собѣ злодѣя искати.

АРТЫКУЛЪ 2.

Зводъ на злодѣя.

Тежъ уставуемъ, которій человѣкъ пойманъ будеть на злодѣйствѣ, а приведенъ съ чимъ до замку або до вряду нашого, а тотъ бы повѣдалъ заводцу и отъ кого тое лице маеть; тогды маеть на томъ же врядѣ нашомъ того заводцу поставити, або сознаньемъ врядовымъ себе очистити, гдѣ будеть то купилъ, а на которомъ врядѣ оповѣдалъ и въ книги записалъ. А естли бы тотъ заводца того обвиненого въ злодѣйствѣ передъ правомъ заступилъ, а тотъ бы заступца бралъ се на иншій зводъ, хотечи вести отъ суда вряду нашого на иншого заступцу до иншого вряду; то ему не маеть быти допущоно, але кождый заступца до остатнего зводу маеть быти ставенъ передъ тымъ врядомъ нашимъ, гдѣ ся початокъ сталъ зводу, а лице во вряду будеть повиненъ тотъ ку зводу выкупити, хто се зводитъ. А вѣдьже за выкупенье большей врядъ не маеть только по дванадцати грошей за кождымъ зводомъ; и кождому таковому, хто се выводитъ зъ маетности оного, на комъ лицо зостанетъ, навезка подлѣ стану всказована быти маеть. А пакли бы у того злодѣя маетности свое не было, чимъ лицо во вряду выкупити, тотъ маеть врядъ лицо жалобливой сторонѣ даромъ вернути, а злодѣй яко за злодѣйство и за вси навезки маеть горломъ приплатити. А естли бы заводцы передъ врядомъ нашимъ достаточнего зводу не поставилъ, а зознаньемъ врядовымъ себе въ томъ злодѣйствѣ не очистилъ; тогды тотъ маеть быти каранъ горломъ яко злодѣй, а шкоды, на чомъ сторона жалобливая присягнетъ, маеть быти плачона зъ дому оного злодѣя. А естли бы остатній себе заводца очистилъ выписомъ врядовымъ, а гдѣ бы рекъ купилъ, або, ижъ то его конь або волъ доморослый, сведѣцствомъ слушнымъ се выправилъ; таковый яко навезокъ такъ и шкодъ никому платити не будеть повиненъ, нижли естли бы тую речъ купилъ, пенези свои татитъ. А пакли бы сторона поводовая, которая позвала, и менила коня або вола своего доморослымъ або речъ дома уробленую, якъ сукно и якую кольвекъ иншую речъ, сторона обжалованая, которая будеть зъ лицомъ приведена, будучи тежъ не подойзреная, менила быти своимъ доморослымъ або дома вробленымъ, а подобенство къ тому стегало, хотя бы обѣдвѣ стороне выдали свѣдковъ годныхъ; тогды за подобенствомъ и за свѣдецствомъ сторона обжалованная при своихъ свѣдкахъ близшая будетъ ку доводу, ижъ то естъ доморослое, або дома вробленое, бо тому бы вжо шло о горло, а вѣдже судъ подобенства всякіе на доброй бачности мають мѣти, и въ речахъ вонтпливыхъ склоннѣйшій маеть быти ку вызволенью нижли ку каранью. А простого стану человѣкъ, которій первый або другій разъ около таковыхъ речей будеть обвиненъ, тотъ ку таковому отводу немаеть быти припущонъ.

АРТЫКУЛЪ 3.

Для покою посполитого застановенье отъ злодѣйства.

Отъ того часу уставуемъ и хочемъ мѣти, абы кождый съ подданыхъ нашихъ и подданыхъ князскихъ панскихъ и духовныхъ и свѣцскихъ и боярскихъ, такъ можного стану яко и меншого, хто бы кольвекъ што въ кого на торгу въ дому або гдѣ кольвекъ коня, вола, корову и иншые всякіе речы купилъ; то маеть на то мѣти баришниковъ людей добрыхъ вѣры годныхъ, и съ тымъ истцемъ, въ кого што купитъ, и съ баришники прійти до вряду замку або двору нашого або до войта мѣстского въ книги врядовые записати, а тыми, естьли будеть потреба, у права себе очистити. Нижли естли бы хто потомъ тую речъ позналъ, и того передъ врядомъ довелъ, же его властная речъ; тогды тотъ, хто купилъ, передъ врядомъ маеть оному, хто позналъ и довелъ, вернути, и будеть ли мѣти, же при томъ лицы много погибло, тогды тотъ, хто купилъ, маеть отприсегнутися, ижъ болшей тыхъ речей не купилъ а ни свѣдомъ.

АРТЫКУЛЪ 4.

О важности лица, за што злодѣй каранъ быти маеть.

Уставуемъ, ижъ кождый злодѣй зъ лицомъ приведеный и правомъ покананый при лицы, которое бы стояло вышей полтины грошей, маеть горломъ каранъ быти. А што бы за полтину грошей не стояло; маеть у столпа дубцы битъ быти, а лицо маеть вернути тому, чіе есть, а навезка на тое лицо зъ маетности его маеть быти плачона, а не будеть ли чимъ мѣти навезки платити, тогды ухо тому злодѣю маеть урѣзано быти. А которое бы лицо вышей полу-копка або за полкопы стояло; при таковомъ лицу маеть быти также у столпа битъ и зъ мѣста высвѣдчити. А которое лице будеть стояти за дванадцать грошей, за то также маеть битъ быти; а потомъ того жъ естли бы се трафило поймати зъ лицомъ, хотя бы тое лице и десети грошей не стояло, тогды вжо маеть быти каранъ яко злодѣй.

АРТЫКУЛЪ 5.

Якъ маеть въ дому чіемъ лицо^[1] зостати.

Уставуемъ, хто бы хотѣлъ у чіемъ дому речи краденые застати; тогды отъ вряду беручи возного маеть передъ врядомъ ознаймити, што ему згинуло, и чого передъ вознымъ въ дому его искати маеть, а въ мѣстѣ мѣстскаго вижа и къ тому людей постороннихъ вѣры годныхъ маючи при собѣ, и при нихъ въ ономъ дому тыхъ речей искати краденыхъ маеть. А скоро бы тамъ што речей краденыхъ нашолъ и того при томъ лицы зосталъ, маеть при томъ же возномъ людехъ сторонныхъ того, кого при лицы зостанетъ, вести до вряду нашого, а естли никого не зостанеть, одно лице знайдеть, однакожъ съ тымъ лицомъ маеть вести або ѣхати до вряду нашого и тамъ далей поступовати ведле права. Пакли жъ хто у своемъ дому крадежу искати не допустилъ, клетей и иныхъ домовъ и схованей отомкнути не хотѣлъ; тогды тотъ, хто не допустилъ, будеть повиненъ тую всю шкоду сторонѣ жалобливой платити ведле доводу або присеги. Тымъ же способомъ, хто бы хотелъ въ чіего человѣка крадежъ зостати, маеть се заховати яко вышей описано; нижли только, з вознымъ и зъ стороною оступивши домъ подданого чіего, маеть того пана або врядника, а не будеть ли врядника а ни тивуна ино старшого, хто въ томъ селѣ будеть, обослати, оповѣдаючи тое, абы не розумѣлъ кгвалтовного наѣханья. Естли жъ бы панъ або врядникъ его при томъ обыску быти не хотелъ; тогды сторона жалобливая предсе съ тыми, кого маеть при собѣ, обыскъ чинити и вси схованья трести, и нашодши съ тымъ до вряду вести маеть. Шаблон:Примечания

АРТЫКУЛЪ 6.

О гоненье слѣдомъ въ якой кольвекъ шкодѣ покраденой.

Кому бы покрадены кони волы быдло и иные речи въ дому, а тотъ шкодный поднялъ бы слѣдъ тое шкоды своее, и собравшы людей добрыхъ околичныхъ сусѣдовъ водле давного обычаю гонилъ слѣдомъ, а тотъ слѣдъ гдѣ бы ку которому селу або въ чій домъ привелъ; тогды маеть послати до того села або до дому, гдѣ слѣдъ вшолъ, людей добрихъ стороннихъ вѣры годныхъ, абы зъ села своего и зъ дому, гдѣ бы слѣдъ вшолъ, або зъ кгрунту земли села своего слѣдъ вывели. Таковое село або в чій домъ слѣдъ будеть вшолъ, мають тотъ слѣдъ въ тое копы взяти и зъ села або зъ дому и зъ земли своее того села слѣдъ вывести ажъ до иншое границы, куды тотъ слѣдъ пойдеть. А естли бы тое село, до которого слѣдъ приведенъ, отъ себе слѣду не вывели або оть слѣду отбили або выгнавши быдломъ затоптали; на таковомъ зостановившисе копа тая, гдѣ слѣду не отведено або отбито, мають послати по возного до вряду нашого замкового, и съ тымъ вознымъ и люди сторонные копа вся мають оную шкоду осумовати, на чомъ оный шкодный самотреть присягнетъ, и приложить до того села, абы они шкоду заплативши собѣ винного искали. А по сказанью мають черезъ возного и сторону, которіе при томъ были объявити вряду и половину пересуда дати, а врядъ маеть рокъ заплатѣ зложити, и яко рокъ выйдетъ; тогды врядъ оного пана листомъ своимъ напоменути маеть, абы водле права оного суду копного заплату чинилъ, а не будеть ли хто хотѣти, тогды тая шкода зъ уряду отправена маеть быти.

АРТЫКУЛЪ 7.

Хто бы шляхтича першій разъ о злодѣйство безъ лица передъ врядомъ обвинилъ.

Уставуемъ, хтобы шляхтича обвинилъ о злодѣйство безъ лица и безъ кождое слушное причины; тогды таковое обвиненье оному шляхтичу шкодити не маеть, и за таковое обвиненье повиненъ будеть его навезати, яко бы его ранилъ. Пакли жъ бы оного обвиненья якое записованье до книгъ, або гдѣ индей поволанье, або якіе слушные причины, або знаки показалъ, а тотъ шляхтичъ еще отъ того се не отводилъ а ни отприсегалъ; тогды таковый обвиненый будеть повиненъ першій разъ того самъ особою своею отприсегнутисе, и кгды присягнеть, навезки ему дати не повиненъ. Паклижъ бы того шляхтича о злодѣйство передъ врядомъ другій разъ тымъ же обычаемъ обвинено и поволано было; тогды маеть самотреть зъ шляхтою вѣры годными отприсегнутисе, также безъ навезки. Того жъ шляхтича поволаного кгды бы третій разъ о злодѣйство у права было обвинено; маеть самъ семъ зъ шляхтою вѣры годными отприсегнутисе, а въ недостатку свѣдка або двохъ маеть шкоду платити, а собѣ винного искати. А четвертый кроть того жъ шляхтича естли бы у права о злодѣйство было обвинено, а знаки слушные были бы показаны, бы тежъ и лица при немъ не зостали, а сторона поводовая самъ третей его поприсегнула; тогды маеть горломъ каранъ быти яко злодѣй.

АРТЫКУЛЪ 8.

О шляхтичу лѣть зуполныхъ не маючому.

Естли бы се трафило, ижъ бы шляхтичъ въ лѣтехъ чотырнадцати и не большъ обвиненъ о злодѣйство, або приведенъ былъ о злодѣйство зъ лицомъ передъ врядъ; тогды таковому про молодость лѣтъ его не маеть быти поличоно за злодѣйство, и не маеть быти до ката въ руки и на муку даванъ, нижли тую шкоду отецъ его або матка або кровные зъ имѣнья части его повинни зъ навезкою платити, и заплативши то почтивости его шкодити не маеть, а не будеть ли мѣти чимъ платити, ино дати его на выслугу, поки бы то заслужилъ, што зашкодилъ. Тымъ же тежъ обычаемъ можеть се розумѣти и о дѣтехъ людей простыхъ лѣтъ недорослыхъ. А ведьже и таковый хлопецъ недорослый естьли бы въ колку злодѣйствахъ и при лицы былъ дознанъ, таковыхъ врядъ маеть карати водле зданья своего.

АРТЫКУЛЪ 9.

О поволаньяхъ.

Уставуемъ, абы поволанья злодѣйскіе передъ врядомъ оповѣданы и явнѣ высвѣдчоны и до книгъ кождого вряду записованы были, которые книги яко передъ тымъ и теперъ зовуть чорными книгами; таковое оповѣданье и поволанье врядовнѣ записаное маеть у права вездѣ мѣстцо мѣти и пріймовано быти.

АРТЫКУЛЪ 10.

Хто бы злодѣя приличного въ себе въ дому ховалъ, або вѣдомостъ о немъ мѣлъ.

Уставуемъ и сказуемъ, ижъ коли бы хто злодѣя приличного вѣдоме въ дому своемъ ховалъ, або мѣшкати допустилъ, або злодѣя явного отъ шебеницы своими пенезми откупилъ; тогды таковый кождый, естьли бы то на него слушнымъ правомъ было переведено, всю шкоду, которая бы се кому черезъ того злодѣя зъ имѣнья его стала, будеть повиненъ платити и оправовати. Тымъ же обычаемъ естли бы кому злодѣя правомъ поконаного на смерть выданого, а онъ бы его не скаралъ, а потомъ кому кольвекъ отъ того злодѣя шкода будеть се дѣети; тогды тотъ, хто злодѣя пустилъ, будеть повиненъ тую всю шкоду платити и оправовати.

АРТЫКУЛЪ 11.

О покраденье свирна або клети панское шляхецское и тежъ клети мужицкое.

Тежъ уставуемъ, кгды бы покрадено которому пану або земенину свиренъ скарбный або спижарный, а то бы на кого правомъ было переведено; тогды за таковый свиренъ будеть повиненъ заплатити дванадцать рублей грошей, и шкоду покраденую за присегою оправити. Тымъ же тежъ обычаемъ естьли бы мужикъ мужику клеть выкралъ; тогды за покраденье клети мужику три рубли грошей, и шкоду всю зъ дому злодѣйского маеть за присегою плачоно быти. А за навезку объ его злочынство, або колько ихъ будеть, мають горломъ караны быти.

АРТЫКУЛЪ 12.

О лицо, которое найдетъ се въ дому человѣка неподойзрѣного.

Уставуемъ, кгды бы у человѣка неподойзреного за замкомъ было лицо знайдено, а до тое хоромины было вкинено и не приховано; тогды таковый человѣк, естьли будеть неподойзрѣный, маеть зъ жоною и зъ дѣтьми дорослыми, будеть ли ихъ мѣти, отприсегнутисе. Тымъ же обычаемъ, кгды бы лицо засталъ въ чіемъ дому въ гумнѣ або за плотомъ; потомужъ маеть тотъ человѣкъ неподойзрѣный отприсегнутисе, ижъ того не вѣдомъ. А естьли бы въ хороминѣ замкнено было найдено, а тое лицо было бы прихоронено, хотя бы и окно было, куды вкинути; тогды таковое лицо маеть быти поличоно за злодѣйство, съ которимъ, кого при томъ лицы зостануть, маеть быти веденъ до вряду и тамъ зъ нимъ яко съ приличнымъ далей поступовати.

АРТЫКУЛЪ 13.

О злодею, которого на злодѣйствѣ поймають.

Естли бы злодѣй былъ пойманъ на злочинствѣ а не въ дому своемъ, а тые речи краденые въ дому еще не были; таковый злодѣй самъ одинъ маеть за тое злочинство каранъ быти, а жона, дѣти и домовая челядь отъ того прожна.

АРТЫКУЛЪ 14.

О знаки злодѣйские на человѣка неподойзрѣного.

Уставуемъ, кгды бы на которого человѣка простого неподойзрѣного, которій еще при лицы не былъ, знаки злодѣйскіе были описаны, а тые знаки были бы слушные, а тотъ неподойзреный былъ бы человѣкъ добрый вѣры годный, при которомъ сторона жалобливая его поприсегнути за своего шкодника хотѣла; за таковыми знаки и присегою стороны жалобливое тотъ человѣкъ маеть быти выданъ на муку, и естли бы се не домучилъ, тогды маеть его навезати водле стану его, вѣдьже большей не маеть быти мучонъ одно разъ.

АРТЫКУЛЪ 15.

Три кроть злодѣя приличного одного дня можеть мучити.

Уставуемъ, кгды бы поймано злодѣя приличного, а на тотъ часъ безъ лица будеть пойманъ; тогды такового злодѣя три кроть одного дня можеть мучити, только бы на которомъ человѣку не образилъ. А естли бы не домучилсе; тогды за кождымъ разомъ муки оное маеть его навезати водлѣ стану его. Пакли жъ бы у въ оной муцѣ злодѣйства на немъ домучитисе не могъ, а оною мукою уморилъ, або на чдонку образилъ; таковый будеть повиненъ за умерлого головщизну а за хромоту пол-человѣка платити водлугь стану его. Нижли естьли бы тотъ злодѣй въ оной муцѣ для чаровъ спалъ, а муки не чулъ, а тые чары были бы при немъ найдены у въ устехъ, або на головѣ у волосехъ, подъ пахою, або гдѣ индей; тогды навезки ему дати не повиненъ, и еще таковый приличный злодѣй будеть для таковыхъ чаровъ повиненъ сторонѣ жалобливой шкоду платити, на чомъ присягнетъ.

АРТЫКУЛЪ 16.

О злодѣяхъ и разбойникохъ, которые бы врядника своего поволали.

Уставуемъ, кгды бы чіихъ колвекъ подданыхъ злодѣевъ або розбойниковъ и якихъ колвекъ злочинцовъ поймано, а они бы идучи на смерть поволали врядника своего, ижъ того злодѣйства ихъ свѣдомъ, и тымъ лупомъ зъ нимъ се дѣлили, а тотъ врядникъ былъ бы шляхтичъ; таковый маеть першій кроть отприсегнутисе самъ одинъ. А потомъ естли бы таковыхъ другихъ и третихъ злочинцовъ поймано, а тые также идучи на смерть того поволали и на шыбеницы не отволали; тогды тотъ отъ тыхъ поволаней маеть отприсегнутисе такъ, яко о шляхтичу естъ вышей описано. А за четвертымъ разомъ естли бы тымъ способомъ былъ поволанъ; тогды вжо безъ кождого отводу и присеги и безъ лица маеть быти сказанъ на смерть яко злодѣй. А гдѣ бы тотъ врядникъ не былъ шляхтичъ; тогды за першимъ поволаньемъ злодѣйскимъ, которіе бы то смертью запечатовали, маеть сторонѣ шкоду платити, на чомъ присягнетъ. Пакли жъ бы того врядника нешляхтича повторе таковые жъ злодѣи и тымъ же способомъ поволали, и также смертью запечатовали; таковый нешляхтичъ вжо безъ кождого лица маеть сказанъ быти на смерть яко злодѣй, и по такового за тымъ знаки слушными и поволаньи правными покананого маеть врядъ повѣту кождого зослали, и на врядѣ нашомъ господарскомъ поставившы казати на него фолдровати.

АРТЫКУЛЪ 17.

О человѣка неподойзрѣного.

Уставуемъ, кгды бы шляхтичъ которого нешляхтича неподойзрѣного помовилъ, менуючи ижъ бы его злодѣемъ былъ, и отъ него въ злодѣйствѣ ему се шкода становила, и не маючи никоторыхъ слушныхъ знаковъ хотѣлъ его о злодѣйство по присегнути; тогды тотъ человѣкъ, яко будучи неподойзреный, близшій будеть самотреть зъ сусѣды собѣ ровными, также людми добрыми и неподойзреными, отприсегнутисе, а судъ ему того маеть допустити. А другій разъ кгды бы того жъ о злодѣйство было обвинено; тогды за другимъ разомъ обвиненьемъ отъ шляхтича маеть быти поконанъ водлѣ права и присеги яко злодѣй.

АРТЫКУЛЪ 18.

О неповоланомъ шляхтичу.

Тежъ уставуемъ, естли бы которому шляхтичу не згола але за причиною слушною дана злодѣйская вина; тогды тотъ позваный отъ того маеть се отвести присегою своею тѣлесною. Тежъ повторе кгды бы тому шляхтичу о тое жъ и таковымъ обычаемъ вина злодѣйская дана; тогды позваный самотреть зъ шляхтичами собѣ ровными маеть се присегою отвести. Третій разъ кгды бы тому жъ шляхтичу тымъ же способомъ вина будеть дана; тогды позваный самъ-семъ зъ шляхтами маеть отприсегнутисе и правъ будеть. А вѣдьже кгды четвертый разъ томужъ шляхтичу въ томъ же вина будеть дана; тогды позваному до права вжо не ему маеть быти отводъ, але на него доводъ присегнути зъ шляхтою собѣ ровною самотрему, и съ права за слушнымъ доводомъ маеть быти каранъ ведле вины и учинку своего.

АРТЫКУЛЪ 19.

О забитье злодѣя при лицы.

Уставуемъ, тежъ хтобы злодѣя при лицы своемъ забилъ, такового злодѣя забитого того жъ часу по ономъ забитью маеть оказати сусѣдомъ околичнымъ и потомъ што нарихлей зъ ураду нашого, которій наближей будеть, вознымъ и стороною обведши до вряду привести и оказати маеть. А потомъ будеть ли о то позванъ до права; тогды врядъ ему маеть допустити отприсегнутися, ижъ его на злочинствѣ при лицу въ дому своемъ забилъ. Такъ тежъ естли бы се потрафило кому на дорозѣ злодѣя погонити, а онъ бы се поймати не далъ, а въ томъ при лицы былъ забитъ; тогды тотъ, хто гонить въ дорозѣ за злодѣемъ, маеть мѣти при собѣ сусѣдовъ або стороннихъ людей, и съ тыми привезши трупъ передъ врядомъ маеть высвѣдчитисе, ижъ его при лицы забилъ. А будеть ли о то ку праву позванъ; также маеть съ тыми людьми, съ кимъ за злодѣемъ гонилъ, на томъ присегнути, ижъ на злодѣйствѣ при лицы, яко злодѣя своего, забилъ, а раннего злодѣя зъ лицомъ маеть вести до вряду нашого, такъ яко вышей описано; бо злодѣя при лицы пойманого нихто не маеть и одного дня въ себе держати, але того жъ часу вести до вряду. А хтобы злодѣя черезъ день и черезъ ночь въ себе въ дому держалъ; тогды пришедши до вряду первей виненъ будеть его навезати водлѣ стану. А ранный естьли будеть пойманъ, а до вряду черезъ ночъ и черезъ день держанъ, и тамъ въ дому его умеръ; тогды будеть повиненъ головщизны платити водлугъ стану. Тымъ же обычаемъ естли бы хто злодѣя поймавши и до вряду не ведучи, въ дому въ себе або на дорозѣ, еще правомъ не поканавши, мучилъ; таковый также первей будеть повиненъ его навезати, тожъ потомъ въ право зъ нимъ вступовати.

АРТЫКУЛЪ 20.

Хто бы што вкралъ на дворѣ нашомъ господарскомъ.

Тежъ хто бы на дворѣ нашомъ господарскомъ што вкралъ, а то бы стояло меньшей полукопья, которая бы речъ не о шію шла, и правомъ бы на него переведено або лице вынято; таковому мають уши обрѣзати. А потомъ естьли бы еще што вкралъ, бы тежъ краденая речъ и десети грошей не стояла; тогды вжо горломъ маеть быти каранъ.

АРТЫКУЛЪ 21.

О жонахъ и о дѣтехъ, копюрые уживали речей украденыхъ.

А естли бы въ дому лицо зостато, а дѣти и жона при томъ были и тыхъ краденыхъ речей уживали; тогды они повинни будуть тую шкоду платити и сами головами выдаваны быти, нижли не у вѣчную неволю поколь се выробять, яко тымъ которіе бы закуплены были, а горломъ тотъ самъ злодѣй маеть быти каранъ, которій укралъ.

АРТЫКУЛЪ 22.

О лицу важномъ, што будеть дано до двору нашого господарскаго.

Къ тому уставуемъ, естли бы лицо принесено было до вряду нашого господарского князъского панского и земянского, а было бы тое лицо речъ важная, шаты або серебро або кони добріе, а того бы злодѣя маетность не стояла, не знесла, чимъ бы мѣлъ зъ дому своего сторонѣ жалобливой шкоду платити; тогды таковое лицо важное зъ двора нашого господарского также князского панского и земянского маеть дармо вернено быти тому, чіе будеть, а тотъ злодѣй на шибеницу маеть выданъ быти.

АРТЫКУЛЪ 23.

О слугахъ безъ приказу и о тыхъ, што безъ службы мешкають.

Уставуемъ, хто бы переховывалъ себе якихъ людей безъ службы або слугъ безъ приказу, отъ которыхъ се мели бы шкоды або забойства дѣяти въ сусѣдствѣ, або кому жъ кольвекъ, и подъ часомъ стала бы се шокода отъ таковыхъ або раны або головщизна; тогды тотъ, хто таковыхъ переховываеть, за переведеньемъ правнымъ, хотя бы ему не были припоручонны, виненъ ихъ отыскивати и сторонѣ жалобливой ку праву ставити, а гдѣ бы не поставилъ, маеть шкоду всю або раны заплатити, яко вышей о головщизнахъ естъ описано.

АРТЫКУЛЪ 24.

О блудяги.

Княжата панове хоруговные о блудяги мають се заховати подлѣ давного обычаю, нижли мають брати отъ клячи по шести грошей, а быдло мають давати даромъ. А шляхта, которые седятъ у повѣтехъ, блудные клячи и быдло мають водити и давати до дворовъ нашихъ, а черезъ три дни въ себе мають ховати. А хто бы черезъ три дни въ себе блудягу ховалъ, а ку двору нашому не далъ, а то будеть на него переведено, и лицо въ дому его вынято; тогды маеть въ томъ виненъ быти яко злодѣй. А хто злодѣя зженетъ отъ коней; ино згонного маеть быти дано вряднику нашому шесть грошей, а тому хто зженетъ другую шесть грошей.

АРТЫКУЛЪ 25.

О покраденьи збожъя всякого иле на поли зложонымъ у стыртахъ.

Уставуемъ, кгды бы хто злодѣйскимъ обычаемъ чіе збожъе або сено бралъ, а тотъ, чіе збожъе або сено будеть, беручи засталъ; тогды тотъ, хто застанетъ, маеть поймавши вести съ тымъ лицомъ зъ возы и съ коньми до вряду гдѣ наиближей, а тотъ врядъ будеть повиненъ съ таковымъ справедливость чинити яко зъ иншими злодѣи приличными. А естли бы тые, што по жито або по сено пріѣхали, пойматисе не дали, а въ томъ кого съ тыхъ злочинцовъ забито або ранено; тогды предесе маеть объявити вряду и трупъ або ранныхъ оказати. А будеть ли о то ку праву приятягненъ; тогды того маеть отприсегнутисе, ижъ при збожъю своемъ забилъ або ранилъ, таковый головщизны а ни ранъ платити не будеть повиненъ. Пакли жъ бы тые злочыны змоцнившисе того пана самого або слугъ и подданыхъ его при его збожъю побили и поранили або и забили, а то бы на нихъ слушнымъ доводомъ было переведено; таковые будуть повинни кгвалтъ платити дванадцать рублевъ грошей и раны слугамъ и подданымъ оправити, якого стану будеть, а естли бы шляхтича забито, тогды маеть горломъ каранъ быти водле покананья стороны жалобливое, кому вина будеть дана, а кгвалтъ и шкоды зъ имѣнья и маетности ихъ платити. Также кого бы поймано крадучи сноповье скопъ, або сенные копы, або тежъ жито упрежмо рѣжучи подъ колосъ; таковый, зъ лицомъ кгды будеть приведенъ, маеть у столпа пугами битъ быти, а шкоду зъ маетности его заплатити, естьли што будеть мѣти.

АРТЫКУЛЪ 26.

О покраденью ставу и сажовки.

Уставуемъ, коли бы злодѣйскимъ обычаемъ ловлены рыбы въ ставѣ або въ сажовцѣ; таковый, кгды будеть пойманъ и приведенъ до вряду зъ лицомъ, маеть каранъ быти яко злодѣй, хотя бы лицо не стояло шацуючы десети грошей.

АРТЫКУЛЪ 27.

О небезпечность отъ огня.

Кгды бы се трафило подъ часомъ отъ огню погрунья въ мѣстѣ або гдѣ жь кольвекъ, або хто на водѣ стонулъ, а въ томъ часѣ што ему згинуло, которая згуба у кого кольвекъ бы се въ рокъ або до року затаеная показала; тогды тую речъ, яко важна будеть, маеть у четверо цѣною заплатити тому, въ кого то згинуло. А естли бы се тая речъ по року або въ колько лѣтехъ показала; тогды маеть цѣною заплатити. А бутеть ли хотѣти сторона жалобливая на него и по року фолдровати; тогды можеть яко на злодѣя, што будеть на воли его, хто маеть, фолдровати.

АРТЫКУЛЪ 28.

Хто бы кого обвинилъ, а передъ врядъ привелъ, маеть того жъ часу описатися, на которій рокъ маеть доводити.

Тежъ коли бы кого обвинивши передъ врядомъ и до везенья або за поруку давши и рокъ отъ вряду ку доводу принявши, самъ безъ слушное причины не сталъ на томъ року, и слушныхъ причинъ нестанья своего презъ посланца за часу не ознаймилъ; тогды врядъ по выйстью оного року обвиненого маеть вольнымъ чинити, а вольное мовенье у права съ тымъ, хто его обвинивши не доводилъ, заховати.

АРТЫКУЛЪ 29.

О человѣка отчизного и человѣка хто его выкралъ.

Уставуемъ, естли бы хто вывелъ або выкралъ чіего человѣка отчизного або челядника невольного, а погоненъ былъ на дорозѣ и пойманъ съ тымъ человѣкомъ або съ челядью; тогды маеть съ тымъ лицемъ веденъ быти до вряду нашого, гдѣ наближей будеть, а врядъ маеть ему справедливость учинити. А естли бы оный къ тому се не зналъ, абы тую челядъ выкралъ; тогды оный, хто его съ тою челядью поймаеть, маеть на него доводити або присегу учинити, ижъ онъ ее вывелъ, а онъ маеть быти каранъ яко злодѣй, а челядь оная маеть вернена быти, чія была. Пакли бы на дорозѣ погонити не могъ, а въ дому чіемъ зосталъ и припоручилъ, а онъ бы тое челяди выдати не хотѣлъ; тогды маеть тотъ панъ, у чіего человѣка гдѣ тую челядъ зосталъ, съ таковымъ справедливость учинити, и найдетъ ли се съ права, тотъ ижъ се выдати хотѣлъ; тогды отъ того часу колько черезъ прируку держалъ, мають тую челедь навезати и навезавши ему челядь вернути, яко о томъ вышей описано.

АРТЫКУЛЪ 30.

Хто кого обвинитъ въ томъ выступѣ, которихъ кривавою виною або горломъ карають.

Хто кого обвинитъ въ томъ выступѣ, которихъ кривавою виною або горломъ карають, а ижъ тотъ выступъ явный не будеть; маеть быти данъ певный часъ ку отводу сторонѣ позваной, а вѣдьже такъ, естли врядъ обачить, ижъ ку слушному се одводу беретъ. А будеть доводъ таковая особа, которая не звыкла людей помавяти, а естьли на оный часъ не доведе, которій доводъ отъ вряду ему будеть назначонъ; маеть быти онъ отпущонъ, волно обвиненому, маеть заховати зъ нимъ право о обвиненье. А естли будетъ речъ межи ровными особами; тогды тотъ, хто кого обвинитъ, маеть се дати посадити зъ обвиненымъ и на него, што будеть вести, доводити. А естьли бы хто на кого не довелъ, то што на него ущипливаго мовитъ, а тотъ бы обвиненый была особа легка, злого захованья посполитый корчемникъ, грачъ (sic) подозрѣный, або передъ тымъ поволаный; противъ таковоиу, хотя будеть доведено, не маетъ тотъ, хто его помовилъ, жадное трудности, хотяжъ обвинено, терпѣти. Такжо тые особы, которые зъ великого а значного жалю, што на него менять, яко родичи о забитье дѣтей, сынове о забитье родичовъ, мужъ о жону, жона о мужа, опекунъ о сироту, и дѣдичъ о таковомъ, по комъ дѣдицство взялъ, або великую шкоду, а значило бы се, ижъ не вымысломъ потвареного помовилъ, але за оболживость зъ жалю и фрасунку; таковые тежъ не мають ничого тепѣти, хотя не доведетъ, а то для того, бы ся ити жаль по жалю не двоилъ. Тымъ же обычаемъ и великій выступъ, который се або маестату особѣ господарской або речи посполитой ткнулъ; того выступу хотя бы хто не довелъ, а мѣлъ бы слушную причину, для которое бы кого въ томъ зыступѣ помовилъ, таковый хотя не доведетъ, не маеть ничого платити ^[2].

1. Въ рукописи лицо пропущено.
2. Въ рукописи: «Finis Statuti.» и потомъ помѣщены слѣдующія за симъ формы записей.