Успамін (Пушкін/Суніца)

Успамін
Аўтар: Аляксандр Пушкін
1828 (пераклад ?)
Арыгінальная назва: Воспоминание
Пераклад: Рыгор Суніца

Прапануем да спампаваньня!

Успамін

Як для смяротнага замоўкне тлумны дзень,
         І на нямым працягу вуліц
Напоўпразрысты ляжа ночы цень,
         І сон людзей спрацованых атуліць,
Тады ў цішы пацягнуцца ў мяне
         Гадзіны цяжкіх мрый, турботаў:
Ў бяздзеянні начным ярчэй гараць ва мне
         Змяі сардэчнае згрызоты;
Рой мараў; у вуме, прыдушаным тугой,
         Чаўпецца важкіх думак скутак;
І успамін маўчком перада мной
         Свой доўгі развінае скрутак;
І, з прыкрасцю чытаючы сваё жыццё,
         Я і трымчу, і праклінаю,
І горка скарджуся, і слёзы лью руччом,
         Але радкоў маркотных не змываю.