|
Мы з тых, каго вы так чакалі
З надзеяй, радасьцю й любоўю;
Сюды прышлі з чырвонай далі,
Акрыты пылам, потам, кроўю.
Ня ведаем мы змардаваньня:
Мы — сіла грамады бязьлікай,
Ваякі працы і змаганьня,
Сябры комуны мы вялікай.
Тварцы ўсіх фабрык і заводаў,
Спрадвеку б‘ёмся мы за волю.
Мы — ворагі ліхіх прыгодаў;
Нясём у край мы шчасьце, долю.
Прышлі і моцнымі рукамі
Будуем тут палац вялікі,
Змагацца хто пасьмее з намі?..
Хаўрус наш моцны і бязьлікі!
Хоць шлях наш камяністы й цяжкі,
Мы ў працу верым і змаганьне;
І дружна ўзьняўшы молат важкі,
Шлём новай долі прывітаньне.
У барацьбе з вялікай бурай
Мы моц сваю загартавалі.
Ня грозны нам цяпер віхуры:
Як волат — мы магутны сталі!
Наш кліч да ўсіх, чыё сумленьне
Яшчэ хоць малай іскрай зьяе:
Да працы з намі!.. Йдзём з натхненьнем!..
Нас слава вечная чакае.
| 
Прапануем да спампаваньня!