Шляхам жыцьця (1913)/IV/Наша вёска/Вёска, о ціхая вёска мая…

← Наша вёска 1.

Наша вёска 2. Верш Аўтар: Янка Купала 1913 год

Наша вёска 3. →

Іншыя публікацыі гэтага твора: Вёска (Горы ды каменьне…)

Прапануем да спампаваньня!

2.

Вёска, о ціхая вёска мая,
Колькі ты зносіш нешчасьцеў,
Колькі бед зносіць сямейка твая,
Колькі дарэмных напасьці!

Цёмные ночы абселі цябе,
Скрылі дарожкі-пуціны,
Марная ўрода па ўсякай сяўбе,
Крывы, убогі хаціны.
Летам труд цяжкі, хваробы ў зіму;
Родзіць магіла магілу;
С сьвечкай прайдзі, страсяні старану:
Смокчэ бязхлебіца сілы.
Мучышся, вёска, непраўдай старой…
Рукі, працягнеш з надзеяй:
Небо заплачэ халоднай слатой,
Вецер уздохі разьвее.
Вецер і моц, знаць, табе прынясе
С песьняй магучай, як воля,
Што перастоіш палацы ты ўсе,
Станеш да бою з нядолей.