Шлях моладзі (часопіс)/1929/1/Літэратурны аддзел/На гадавіны незалежнай Беларусі

На гадавіны незалежнай Беларусі
Верш
Аўтар: Казімір Сваяк
1929 год
Крыніца: Часопіс «Шлях моладзі», № 1, сакавік 1929 г., б. 10-11

Прапануем да спампаваньня!

НА ГАДАВІНЫ НЕЗАЛЕЖНАЙ БЕЛАРУСІ.

Вялікі дзень. Казаў-бы Хрыстус
Сваей дзень сьмерці непавіннай
Злучае ў зьвязак тайны — дзіўны:
На гэты год на гэты дзень.

Кальварыю прайшла Русьбела,
Крыжамі значана усюды,
Магіл бяз ліку — жертв прыблудаў:
У гэты год, у гэты дзень…

А іншай песьні не пачуеш,
Як толькі стогн, жальбу, скрыготы;
Палынь расьце, цьвітуць асоты:
У гэты год, у гэты дзень.

Ўсе наругаліся даволі,
Судом Пілата пакаралі,
Адзеж дзялілі, воцт давалі:
У гэты год, у гэты дзень.

Прад вокам сьвету крыжавалі
Вучоныя і фарызэі
І кніжнікі і садуцэі:
У гэты год, у гэты дзень.

І страж паставілі цяжкую:
„Ня ўстане з мёртвых аніколі.
„Верыла ў Бога… Яго воля
„Ня ў гэты час, ня ў гэты дзень

Прабілі сэрца, рукі ногі,
Між неразумных палічылі,
Абрабавалі, абяднілі:
У гэты год, у гэты дзень.

Ня верылі, што душу мае,
Над целам зьдзекі учынілі,
У цьвёрдай скале палажылі:
У гэты год, у гэты дзень.

Змілуйся-ж Божа, ты над ею,
Ня дай у гробе век ляжаці,
Пазволь да жыцьця ей устаці:
У гэты год, у гэты дзень.

Казімер Сваяк