Янку Купалу (Пушча)

Янку Купалу Верш Аўтар: Язэп Пушча 1942 Крыніца: https://knihi.com/Jazep_Pusca/Viersy.html#chapter36

Прапануем да спампаваньня!

Сачылася жывая кроў з пяра,

І чара сэрца з песняю разбіты.

Не быў народ пры смерці песняра

І не прыкрыў яго вачэй знябытых.

У вечар той аклікнуў гром прасторы,

І рэкі паплылі народных слёз.

Нашчадкам не раскажа і гісторык,

Як смутак з горам ў нашы сэрцы поўз.

Ад жалю-скрухі людзі камянелі,

Схіляліся ў жалобе на калені

І клікалі радзіму Беларусь:

«Прыйдзі, згарні гарачых песень прысак,

Не згаслі ў ім, гараць Купалы рысы,

Ў крупінцы кожнай б’ецца сэрца пульс».